Elimizde esirtki qylmysyna qatysty jaza ózgerdi

ASTANA. KAZINFORM — Іshki ister mınıstrligi esirtkimen kúres jazasyna ózgerister engizdi. Ol bıyl naýryzda kúshine enedi.

Nashaqorlyqpen kúrestiń negizgi jańashyldyqtary vedomstvoda ótken baspasóz máslıhatynda aıtyldy. 

Birinshiden, esirtki bıznesin uıymdastyrýshylar men esirtki taratýshylar, sonyń ishinde «zakladchıkter», ıaǵnı, esirtki jasyrýshylar úshin qylmystyq jaýapkershilik aıqyndalyp, ajyratyldy.

Eger buryn olarǵa Qylmystyq kodekstiń 297-baby boıynsha birdeı jaza qoldanylsa, endi «zakladchıkter» osy bap boıynsha jaýapqa tartylyp, olarǵa jeńildetilgen jaza qarastyrylady:

• 1-bóligi boıynsha jaza 5 jyldan 8 jylǵa deıin bas bostandyǵynan aıyrýdy quraıdy. Buǵan deıin 5 jyldan 10 jylǵa deıin bolatyn. Atalmysh jaza az kólemdegi esirtkini satý kezinde ustalǵan adamǵa qoldanylady (mysaly, marıhýana — 50 grammǵa deıin; gashısh — 5 grammǵa deıin, mefedron — 0,02 grammǵa deıin, alfa-PVP — 0,01 grammǵa deıin);
• 2-bóligi boıynsha jaza 6 jyldan 10 jylǵa deıin bas bostandyǵynan aıyrýdy quraıdy. Buryn 6 jyldan 12 jylǵa deıin bolatyn. Bul iri kólemdegi esirtkilerdi satý kezinde ustalǵan adamǵa qoldanylady (marıhýana — 1 kg-ǵa deıin; gashısh — 200 grammǵa deıin; mefedron — 0,02 grammnan 1,5 grammǵa deıin; alfa-PVP — 0,01 grammnan 1 grammǵa deıin);
• 3-bóligi boıynsha jaza 7 jyldan 12 jylǵa deıin bas bostandyǵynan aıyrýdy quraıdy. Buryn jaza 10 jyldan 15 jylǵa deıin bolatyn. Bul esirtkilerdi asa iri kólemde satqan jaǵdaıda qarastyrylady (marıhýana — 1 keliden astam; gashısh — 200 grammnan astam; mefedron — 1,5 grammnan astam; alfa-PVP — 1 grammnan astam).

Sonymen qatar, shartty túrde merziminen buryn bosatý, jazanyń ótelmegen bóligin jeńil jaza túrine, ıaǵnı aıyppul nemese bostandyǵyn shekteýge aýystyrý múmkindigi bar. 

Árbir úkimniń sotta jeke qaralatynyn aıta ketken jón.

Ekinshiden, zańmen Qylmystyq kodekske 297-1 baby engizilip, onda esirtki bıznesin uıymdastyrýshylar men esirtki óndirýshilerge, sondaı-aq laýazymdy tulǵalarǵa jaza kúsheıtiledi. 

• 1-bóligi boıynsha — 5 jyldan 10 jylǵa deıin;
• 2-bóligi boıynsha — 6 jyldan 12 jylǵa deıin;
• 3-bóligi boıynsha — 10 jyldan 15 jylǵa deıin;
• 4-bóligi boıynsha — 15 jyldan 20 jylǵa deıin nemese ómir boıyna bas bostandyǵynan aıyrý jazasy.

Úshinshiden, alǵash ret kúshti áser etetin zattar men esirtki óndirisinde paıdalanylatyn prekýrsorlar boıynsha zańsyz aınalym úshin qylmystyq jaýapkershilik engiziledi. 

Buǵan deıin qylmystyq jaýapkershilik tek prekýrsorlardyń kontrabandasyna qatysty bolǵan. Bul ózgerister prekýrsorlar men kúshti áser etetin zattardyń aınalymyna baqylaýdy kúsheıtýge múmkindik beredi.

Aıta ketsek, taıaýda Qarjylyq monıtorıng agenttigi Almaty oblysynda asa iri mólsherde esirtki kontrabandasy faktisi boıynsha sotqa deıingi tergep-tekserýdi aıaqtady. 

Eske sala keteıik, ótken jyly el aýmaǵynda 22 tonna esirtki tárkilendi.