Elimizde esirtki bıznesin uıymdastyrýshylarǵa jaza kúsheıtildi
ASTANA. KAZINFORM – Elimizde esirtki bıznesin uıymdastyrýshylarǵa jaza kúsheıtildi. Bul týraly ІІM Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov aıtty.

- Memleket basshysy 2024 jylǵy 27 jeltoqsanda esirtki quraldarynyń zańsyz aınalymyna qarsy is-qımylǵa qatysty birqatar zańnamalyq aktige ózgerister men tolyqtyrýlar engizý týraly Zańǵa qol qoıdy. Zań 3 naýryzda kúshine endi. Qabyldanǵan túzetýler qylmystyq jaýaptylyq júıesin jaqsartýǵa jáne qylmystyq quqyq buzýshylyqtyń sıpatyna qaraı jazalardy saralaýǵa baǵyttalǵan. Qabyldanǵan zańǵa sáıkes, QR QK-niń qoldanystaǵy 297-babynda esirtki satýshylarǵa, onyń ishinde esirtkini jasyryp qoıyp ketýshilerge eger quqyq buzýshylyq birinshi ret jasalsa jáne ol esirtki quraldaryn jasaýmen nemese qaıta óńdeýmen baılanysty bolmasa qylmystyq jaýapkershilik saqtalady, - dedi ol Ortalyq kommýnıkatsııalar qyzmetindegi brıfıngte.
Onyń dereginshe, 1-bólim boıynsha 5 jyldan 8 jylǵa deıin bas bostandyǵynan aıyrý jazasy bolady. Bul buryn 5 jyldan 10 jylǵa deıin jazany qarastyrǵan edi. Al 2-bólim boıynsha 6 jyldan 10 jylǵa deıin bas bostandyǵynan aıyrý kózdeledi. Buryn 6 jyldan 12 jylǵa deıin jaza qarastyrylǵan. 3-bólim boıynsha 7 jyldan 12 jylǵa deıin bas bostandyǵynan aıyrý qarastyrylady. Buryn 10 jyldan 15 jylǵa deıin bolǵan.
ІІM ókiliniń aıtýynsha, bul tásil memlekettiń quqyq buzýshylardyń jasy men jaǵdaıyn eskerýge degen umtylysyn kórsetedi. Olar úshin jaza merzimin qysqarta otyryp, shartty túrde merziminen buryn bosatýdy odan ári qoldaný, sondaı-aq jazanyń ótelmegen bóligin neǵurlym jumsaq túrmen aýystyrý múmkindigi kózdeledi. Alaıda zań sonymen qatar retsıdıvıster úshin, ózderiniń qyzmettik ókilettigin paıdalana otyryp, esirtkiniń zańsyz aınalymymen aınalysatyn laýazymdy adamdar úshin jáne olardy óndirýmen aınalysatyn adamdarǵa qatysty jazany qatańdatý sharalaryn engizedi. Onda merzimder 15 jyldan 20 jylǵa deıin ne ómir boıyna bas bostandyǵynan aıyrýdy kózdeıdi.
Qazaqstanda esirtki bıznesin uıymdastyrýshylardyń ishinde qaı el azamattarynyń úlesi basym ekenin jazǵan bolatynbyz.