Elimizde eski úıi buzylatyn turǵyndarǵa jańa páter beriledi
ASTANA. KAZINFORM — Qazaqstanda eski úılerdi jańartý baǵdarlamasy aıasynda turǵyndardyń múddesin qorǵaýǵa arnalǵan jańa kepildik tetigi iske qosyldy. Bul týraly «Qazaqstan turǵyn úı kompanııasy» AQ basqarma tóraǵasy Altaı Kúzdibaev Astanada ótken sarapshylyq talqylaýda aıtty.
Búgin elordada «Jalpyhalyqtyq aýqymdy qurylys — 2027: Qazaqstan ekonomıkasy úshin jańa múmkindikter» taqyrybynda sarapshylyq talqylaý ótip jatyr. Jıynda turǵyn úı qurylysynyń qazirgi jaǵdaıy, eskirgen baspanalardy jańartý jáne qurylys salasyna ınvestıtsııa tartý máseleleri qaraldy.
Altaı Kúzdibaevtyń aıtýynsha, búginde Qazaqstandaǵy turǵyn úı qorynyń 46%-y 50 jyldan astam ýaqyt buryn salynǵan. Bul ǵımarattardyń tehnıkalyq jaǵdaıymen qatar, energııa tıimdiligi de ózekti máselege aınalyp otyr.
— Qazir Ónerkásip jáne qurylys mınıstrligi men jergilikti atqarýshy organdar turǵyn úıdi jańartý baǵdarlamalaryn júzege asyryp jatyr. Buǵan Kókshetaý men Almaty qalalaryn mysal retinde keltirýge bolady. Astana men elimizdiń basqa qalalarynda da osyndaı jumystar atqarylýda, — dedi Altaı Kúzdibaev.
Kompanııa basshysynyń sózinshe, bıyldan bastap turǵyn úılerdi jańartý jobalaryna kepildik berý tetigi iske qosylǵan. Onyń basty maqsaty — eski úılerdiń ornyna jańa turǵyn úı salynǵan kezde menshik ıeleriniń quqyqtaryn qorǵaý.
— Biz turǵyn úı qurylysynyń biryńǵaı operatory retinde bıyldan bastap renovatsııa jobalaryna kepildik berý tetigin iske qostyq. Bul eski úılerdiń ıeleriniń de múddesin qorǵaýǵa múmkindik beredi. Qurylys kompanııalary eski aýdandardy jańartýǵa kirisken kezde turǵyndarǵa qurylys aıaqtalǵanǵa deıin jaldamaly baspana berilýine kepildik qarastyrylady. Sonymen qatar «bólmege bólme» jáne teń qundylyq qaǵıdattary boıynsha turǵyn burynǵy úıiniń ornynan salynǵan jańa ǵımarattan tıisti páterin alýǵa kepildik alady, — dep túsindirdi ol.
Osylaısha, renovatsııa baǵdarlamasy aıasynda eski úıi súriletin turǵyndarǵa qurylys kezeńinde ýaqytsha baspana berý jáne jańa úıden burynǵy páterine teń keletin baspana usyný kózdelgen.
Aıta keteıik, sarapshylyq talqylaýda turǵyn úı qurylysynyń kólemin arttyrýmen qatar, ınjenerlik jelilerdi, kólik jáne áleýmettik ınfraqurylymdy damytý máseleleri de kóterildi.
Eske salaıyq, buǵan deıin Qazaqstanda turǵyn úıge muqtaj azamattardy qoldaý tetikteri jetildirilip jatqanyn habarlaǵanbyz.
