Elimizde erlerdiń 88,7%-y bala tárbıesin ómirindegi basty rólderdiń biri dep sanaıdy
ASTANA. KAZINFORM – Qazaqstandyq erlerdiń 88,7%-y bala tárbıeleýdi óz ómirindegi eń basty rólderdiń biri dep esepteıdi. Qazirgi qoǵamda ákeniń otbasyndaǵy róli materıaldyq qamtamasyz etýmen ǵana shektelmeı, bala tárbıesine belsendi aralasý jáne emotsıonaldyq baılanys ornatýmen tolyǵyp keledi, dep habarlaıdy Qazaqstandyq qoǵamdyq damý ınstıtýty.
QQDI Otbasy aptalyǵy aıasynda áke ınstıtýtynyń qazirgi qazaqstandyq qoǵamdaǵy ózgerisine qatysty zertteý nátıjelerin jarııalady.
«Berekeli otbasynyń qalyptasýyna áser etetin faktorlar» atty áleýmettik zertteýge 2 400 respondent qatysqan.
Zertteý nátıjesine sáıkes, er azamattardyń 57,2%-y áke bolýdy ómirindegi eń mańyzdy mindet dep sanaıdy. Taǵy 31,5% respondent áke bolýdy ómiriniń basty aspektileriniń biri retinde baǵalaǵan.
Jalpy erlerdiń 88,7%-y bala tárbıeleýdi óz ómirindegi eń basty rólderdiń biri dep esepteıdi.
– Áke ınstıtýty qoǵammen birge ózgerip keledi. Búginde ákeniń otbasyndaǵy róli tek materıaldyq qamtamasyz etýmen shektelmeı, bala tárbıesine sanaly túrde qatysý, emotsıonaldyq baılanys ornatý jáne otbasylyq jaýapkershilikti bólisý uǵymdarymen tolyǵyp keledi. QQDI-diń 2026 jylǵy zertteýleri osy ózgeristerdiń qazirgi qazaqstandyq qoǵamdaǵy kórinisterin kórýge múmkindik beredi, – delingen ınstıtýt aqparatynda.
QQDI-diń «Qazaqstandaǵy áke ınstıtýty» atty 2026 jylǵy taldaý baıandamasynda ákelerdiń bala ómirine qalaı aralasatyny da qarastyrylǵan.
Zertteý nátıjesi ákelerdiń qoldaýy kúndelikti naqty áreketter arqyly kórinetinin kórsetken. Ákeler balalaryna týyndaǵan máseleni sheshýge kómektesedi, keńes beredi jáne qajet jaǵdaıda olardy qorǵaıdy.
Sonymen birge ákeler balasynyń mekteptegi jaǵdaılaryna aralasyp, onyń bilim alý ortasyndaǵy máselelerine nazar aýdarady.
Zertteýde áke men bala arasyndaǵy emotsıonaldyq baılanystyń da mańyzy atap ótilgen. Qazirgi ákeler arasynda balamen ashyq emotsıonaldyq qarym-qatynas ornatý úlgisi qalyptasyp kele jatqany kórsetilgen.
Osylaısha, qazirgi qazaqstandyq otbasyndaǵy áke beınesi birtindep ózgerip, otbasyn materıaldyq qamtamasyz etýmen qatar bala tárbıesine tikeleı qatysý, qoldaý kórsetý, qorǵaý jáne emotsıonaldyq jaqyndyq ornatý sııaqty mindettermen tolyǵyp keledi.
Aıta keteıik, buǵan deıin Qazaqstanda Otbasy kúnine oraı qandaı is-sharalar ótetini habarlandy.
