Elimizde erler men áıelderdiń basym bóligi qaı salada jumys isteıtini belgili boldy

Ulttyq statıstıka bıýrosy 2021 jylǵy halyq sanaǵynyń qorytyndysy boıynsha halyqty jumyspen qamtýǵa arnalǵan kezekti jınaqty shyǵardy, dep habarlaıdy Kazinform.  

Bıýro málimetinshe, jınaqta salalar, jynys jáne jas qurylymy boıynsha jumyspen qamtý deńgeıi jónindegi kórsetkishterdi, sondaı-aq 2009 jylǵy sanaqpen salystyrǵandaǵy dınamıkalyq ózgeristerdi kórýge bolady. Jınaqtyń eki tomy stat.gov.kz saıtynyń «Ulttyq sanaqtar» – «Sanaq 2021» bóliminde ornalastyrylǵan.

Jumyspen qamtylǵan halyq sany 39% ósti

2021 jylǵy sanaq qorytyndysy boıynsha jumyspen qamtylǵan halyq sany 9 188 myń adam bolǵan, 2009 jylǵy sanaqpen salystyrǵandaǵy ósim – 39,2%.
Jumyspen qamtylǵandardyń negizgi úlesi qalalyq eldi mekenderde – jumyspen qamtylǵan halyqtyń 62,5% nemese 5,7 mıllıonnan astamy. 2009 jyly qalalardaǵy jumyspen qamtylǵan halyqtyń úlesi 57,1% nemese 3,8 mln adam bolǵan. Jas toby boıynsha jumyspen qamtylǵandardyń eń kóp sany 30-34 jas aralyǵynda – 1 450 myń adam.

2009 jylǵy sanaq qorytyndysymen salystyrǵanda 2021 jyly joǵary bilimi bar halyqtyń jumyspen qamtylý úlesi 27,1%-dan 30,8%-ǵa deıin artty.
Jumyspen qamtýdaǵy áıelderdiń úlesi 2009 jylǵy 45%-dan 2021 jyly 48%-ǵa deıin nemese 1,4 mln adamǵa artty.

Salalar bólinisinde jumyspen qamtylǵandardyń eń kóp sany aýyl sharýashylyǵynda – 1,41 mln adam nemese jumyspen qamtylǵan halyqtyń 15,3% (17,9% – 2009 jyly). Odan keıin kóterme jáne bólshek saýda – 1,35 mln adam nemese 14,7% (12,9% – 2009 jyly). Jumyspen qamtý boıynsha úshinshi oryndy ónerkásip salasy alady – 1 mln adam nemese 11,1% (11,5% – 2009 jyly).

Barlyq jumyspen qamtylǵan halyqtyń ishinde erlerdiń eń kóp úlesi nemese 17% aýyl sharýashylyǵynda, al áıelder boıynsha negizinen saýda salasynda – 16%.

Kelesi taqyryptyq jınaq 13 qarashada jarııalanady.