Elimizde erekshe qorǵalatyn 6 tabıǵı aýmaq qurylady
ASTANA. KAZINFORM – Elimizde erekshe qorǵalatyn 6 tabıǵı aýmaq qurylady. Bul týraly Ortalyq kommýnıkatsııalar qyzmetindegi brıfıngte Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev aıtty.

- Bıologııalyq ártúrlilikti saqtap qalý jónindegi konventsııa aıasynda Qazaqstan Respýblıkasynyń mindettemelerin iske asyrý maqsatynda «Elimidiń bıoártúrlilikti saqtaý tujyrymdamasyn» ázirleý jumystary júrgizilýde, Tujyrymdamanyń jobasy el aýmaǵynda erekshe qorǵalatyn tabıǵı aýmaqtardyń alańyn 12,5 paıyzǵa deıin jetkizýge múmkindik beredi. Búgingi kúni ol 11,3 paıyzdy quraıdy, - dedi Danııar Turǵambaev.
Osy rette ol 6 erekshe qorǵalatyn tabıǵı aýmaq qurý josparlanyp otyrǵanyn aıtady. Olar: Aral, Jaıyq ormany, Ertis jaıylmasy tabıǵı rezervattary, Túkti ulttyq parki, Merke óńirlik parki jáne Qyzylqum qoryǵy. Munan bólek Ústirt, Qarataý qoryqtarynyń, Aqjaıyq jáne Ile Balhash rezervat aýmaqtaryn keńeıtý kózdelgengen
- Ulttyq parkterdegi ekologııalyq týrızm – bul qorshaǵan ortaǵa mınımaldy áser ete otyryp, tabıǵı aýmaqtardy tanyp-bilýge baǵyttalǵan jaýapty saıahat. Sońǵy jyldardaǵy statıstıkalyq derekter týrıster sanynyń birtindep ósip kele jatqanyn kórsetedi. Máselen, 2024 jyly Erekshe qorǵalatyn tabıǵı aýmaqtarǵa shamamen 2,8 mıllıon adam barǵan, bul 2023 jylmen salystyrǵanda 400 myńǵa kóp, - dedi komıtet basshysy.
Aıta keteıik, erekshe qorǵalatyn tabıǵı aýmaqtardy paıdalanǵany úshin tólem Ulttyq parkterdiń esebinde qalady.