Elimizde erekshe qajettiligi bar 719 myńnan astam adam turady
Qazan aıynyń ekinshi jeksenbisinde elimizde múgedektigi bar adamdar kúni atalyp ótiledi. Egemendik alǵaly beri elimizde erekshe qajettilikteri bar adamdardyń quqyqtaryn qorǵaý, ómir súrý sapasyn arttyrý jáne olardyń qoǵamǵa tolyq ıntegratsııalanýy jónindegi saıasat júzege asyrylýda, dep habarlaıdy QR eńbek jáne halyqty áleýmettik qorǵaý mınıstrliginiń baspasóz qyzmeti.
Bul kúni múgedektigi bar adamdarǵa qurmet pen qoldaý kórsetýge, qoǵamda azamattardyń teń ekenin jáne ony este saqtaý kerektigin bildiredi.
Búginde Qazaqstanda erekshe qajettilikteri bar 719 myńnan astam adam turady. Bul kún múgedektigi bar azamattardyń máselelerine kóńil bólýge, quqyǵy men densaýlyqtaryn qorǵaýǵa, olardyń saıası, áleýmettik, ekonomıkalyq jáne mádenı ómirge qatysýynan qoǵamǵa keletin basymdyqtarǵa nazar aýdarýǵa baǵyttalǵan.
Erekshe qajettilikteri bar azamattar túrli salada eńbek etýde. Olar Qazaqstan Respýblıkasy Parlamentiniń, oblystyq jáne qalalyq máslıhattardyń depýtattary, memlekettik qyzmetshiler, muǵalimder, dárigerler, ınjenerler, zańgerler, ártister jáne t. b. salalyq mamandyqty ıgerip, jetistikterge qol jetkizýde.
Bul adamdar ózderiniń múmkindikteri múldem shekteýli emes ekenin jáne olar tolyqqandy ómir súre alatyndyǵyn dáleldep keledi. Olar qoǵamdyq jumystarǵa belsendi aralasyp, óz kásipterin damytyp, bı men fıtnespen aınalysyp, ártúrli sport túrlerinde de bıik belesterdi baǵyndyrýda.
Múgedektigi bar adamdar ómirdiń belgili bir problemalyq aspektilerin talqylaýǵa sarapshy retinde belsendi qatysady. Mundaı tájirıbe tıimdi sheshimder qabyldaýǵa oń áser etip, azamattardyń áleýmettik qamsyzdandyrý júıesin odan ári jetildirýge septigin tıgizýde.
Sońǵy jyldary múgedektigi bar adamdardyń quqyqtary men áleýmettik qorǵalýyn qamtamasyz etý júıesinde eleýli ózgerister oryn aldy. Áleýmettik kodeks pen basqa da zańnamalar qabyldanyp, erekshe qajettilikteri bar adamdarǵa bilim alýǵa, jumysqa turýǵa, medıtsınalyq, áleýmettik kómekke jáne t.b. quqyqtarǵa kepildik berýde. Múgedektigi bar eresek azamattar men erekshe qajettilikteri bar balalarǵa arnalǵan ońaltý ortalyqtary ashylýda. Arnaýly áleýmettik qyzmetter kórsetý júıesi jetildirilýde. Respýblıkanyń barlyq óńirlerinde kedergisiz orta qurý boıynsha jumystar atqarylýda.
Qazaqstanda jynysyna, jasyna, ultyna, fızıkalyq erekshelikterine jáne kez kelgen ózge de sıpattamalaryna qaramastan, árbir adam ózin tolyqqandy múshesi retinde sezinetin ınklıýzıvti qoǵamdy damytý jónindegi jumystar óz jalǵasyn taba bermek.
