Elimizde erekshe balalardy qoldaý úshin qandaı jumystar júrgizilip jatyr
ASTANA. KAZINFORM — Abaı atyndaǵy Qazaq ulttyq pedagogıkalyq ýnıversıteti bazasynda minez-qulyqty qoldanbaly taldaý kafedrasyn ashý usynyldy. Bul týraly Ǵylym jáne joǵary bilim mınıstrligi habarlady.
QR Ǵylym jáne joǵary bilim mınıstrliginde sapaly bilim berýdi qamtamasyz etý, erekshe qajettilikteri bar jáne aýtızm spektri buzylǵan balalardy qoldaý úshin jasandy ıntellekt pen zamanaýı tehnologııalardy paıdalaný, ınklıýzııa mádenıetin qalyptastyrý jáne pedagogterdiń kásibı ósýine jaǵdaı jasaý boıynsha jumystar júrgizilip jatyr.
— Dúnıejúzilik Banktiń «Orta bilim berýdi modernızatsııalaý» jobasy aıasynda joǵary oqý oryndarynyń professor-oqytýshylar quramyn jáne bilim berý uıymdarynyń mamandaryn AVA minez-qulqyn qoldanbaly taldaýǵa jáne ADOS-2 aýtızmdi erte dıagnostıkalaý ádistemesine oqytý júrgizildi. Oqý kýrsyn joǵary oqý ornynyń 67 POQ pen bilim berý uıymdarynyń mamandary sátti aıaqtady jáne RBT — «Registered Behavior Technician» — «Tirkelgen minez-qulyq ınstrýktory» biliktiligin bere otyryp, halyqaralyq úlgidegi sertıfıkattar aldy. Bul sertıfıkat aýtızm spektri buzylǵan balalardyń minez-qulyq buzylystaryn túzetý boıynsha jumys isteýge jáne olardyń ata-analaryna sapaly keńes berýge múmkindik beredi, — delingen aqparatta.
Atalǵan baǵdarlamany ázirleýshi jáne kýrs jetekshisi Zýhra Izmaılova-Kamar halyqaralyq minez-qulyqty taldaý boıynsha ekspert, «Azbuka ABA» mektebiniń negizin qalaýshy jáne dırektory (Ottava, Kanada) bolǵan.
Oqýdy aıaqtaǵannan keıin Zýhra Izmaılova «Arnaıy pedagogıka» baǵyty boıynsha bilim berý baǵdarlamalaryn iske asyratyn jetekshi joǵary oqý oryndarynyń birinde minez-qulyqty qoldanbaly taldaý kafedrasyn ashýdy usyndy.
Jobanyń turaqtylyǵy maqsatynda kafedrany Abaı atyndaǵy Qazaq ulttyq pedagogıkalyq ýnıversıteti bazasynda ashý usynyldy.
Qazirgi ýaqytta minez-qulyqty qoldanbaly taldaý zerthanasyn ashý, ony keıinnen ǵylymı kafedra retinde qaıta qurý máselesi talqylanyp jatyr.
Abaı atyndaǵy QazUPÝ halyqaralyq aýqymdaǵy is-sharany ótkizý úshin platformany ǵana usynyp qoımaı, sonymen qatar ınklıýzııany, tsıfrlyq saýattylyqty jáne turaqty bilim berýdi damytýdyń jańa tásilderi zerdelenetin zııatkerlik keńistikti qalyptastyrady.
Buǵan deıin erekshe balalardy qoldaý týraly zań jobasy ázirlenip jatqany týraly habarlandy.