Elimizde eńbek ótilin tirkeý tolyqtaı tsıfrlandyrylady
ASTANA. KAZINFORM — Qazaqstanda eńbek kitapshalaryn qoldanystan shyǵaryp, azamattardyń eńbek ótilin tsıfrlyq formatta tirkeý josparlanyp otyr. Bul jóninde Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev málimdedi.
Onyń sózinshe, memlekettik qyzmetter tsıfrlanyp jatqandyqtan, qaǵaz túrindegi eńbek kitapshasy ózektiligin joǵaltty.
— Biz qaǵaz túrindegi eńbek kitapshalarynan bas tartýdy josparlap otyrmyz. Ol ótken ǵasyrdyń qujaty dep esepteımiz. Jasandy ıntellektini damytý dáýirinde eńbek kitapshalary tarıh qoınaýyna ketýi tıis, — dedi Erbol Tuıaqbaev.
Onyń aıtýynsha, azamattardyń eńbek ótili jónindegi qajetti aqparat memlekettik aqparattyq júıelerde qazirdiń ózinde bar. Al jumys berýshilerdiń derekteri tsıfrlandyrylǵan.
Vıtse-mınıstrdiń málimdeýinshe, 2027 jyldan bastap elektrondy eńbek kitapshalaryna kóshý kezeń-kezeńimen júzege asyrylady. Birte-birte qaǵaz túrindegi nusqasy múlde qoldanystan shyǵady.
— Adam eńbek kitapshasy qaıda saqtaýly, joǵalyp qaldy ma, joq pa, ol jóninde oılanbaýy kerek. Ondaǵy derekterdiń barlyǵy júrgizýshi kýáligi jáne basqa da qujattar sekildi júıede saqtalýy qajet, — dedi ol.
Sonymen birge, eńbek kitapshasyn tsıfrlyq formatqa kóshirý eńbek ótilin naqtylaýdy jedel ári ońaı qylady jáne azamattardyń memlekettik qyzmetti alý úderisin jeńildetedi.
Aıta keteıik, buǵan deıin Eńbek mınıstrligi zeınetaqy júıesin jetildirý boıynsha jumys tobyn qurǵanyn jazǵanbyz.
