Elimizde eń iri qant zaýyty salynyp, 450 turaqty jumys orny ashylady
ASTANA. KAZINFORM – Vıtse-premer – Ulttyq ekonomıka mınıstri Serik Jumanǵarın Al Khaleej Sugar kompanııasynyń prezıdenti Al Ǵýreır Djamalmen kezdesti. Bul týraly Úkimettiń baspasóz qyzmeti habarlady.
Kezdesý barysynda elimizdegi eń iri qant zaýytyn salý jobasyn júzege asyrýdyń daıyndyq barysy qaraldy. Ol úshin «Alataý» arnaıy ekonomıkalyq aımaǵyna kiretin Qonaev qalasy aýmaǵynan 1000 gektar jer bólingen. Qazirgi ýaqytta ınfraqurylym máselesine basa kóńil bólinip, gaz jáne elektr júıesin tartý boıynsha jumystar qolǵa alynýda.
Sonymen qatar shıkizattyq bazany qamtamasyz etý de basty nazarda. Jobanyń birinshi kezeńi aıasynda qant qyzylshasyn ósirý úshin 65 myń gektar jer belgilendi, aldaǵy ýaqytta keńeıtý josparlanǵan. Búginde jerdi bekitý jáne sýarý júıesine daıyndaý boıynsha qajetti rásimder júrgizilýde. Sý ınfraqurylymyn jolǵa qoıý úshin halyqaralyq qarjylandyrý tetigin tartý josparlanyp otyr. Óńirdegi sharýalar bolashaq zaýyttyń talabyna saı bolý maqsatynda 100 myń gektar jerge qyzylsha egýge daıyn ekendikterin rastady.
Taraptar jobany iske asyrýdyń qyr-syryn jan-jaqty talqylap, qurylys jumysyn neǵurlym tezirek bastaýǵa yntaly ekenin tanytty. Tıisti memlekettik qurylymdarǵa qatysty jumystardy úılestirý jáne jedel sheshim qabyldaý úshin jumys tobyn qurý usynyldy. Arab eli tarapy merdigerlik EPC-kelisimshart jasaýǵa da daıyn ekenin jetkizdi, bul jyldam iske kirisýge jol ashady.
Aıta keteıik, Qazaqstandaǵy eń iri qant zaýytyn salý jónindegi ınvestıtsııalyq jobany «QazaqArab Sugar» JShS júzege asyrmaq. Jobanyń jyldyq daıyn ónim qýaty – 500 myń tonna. Jalpy quny – 313,6 mıllıard teńge. Jobany iske asyrý merzimi – 2025-2028 jyldar. 450 turaqty jumys orny qurylatyn bolady.
Aıta keteıik, Úkimette Almaty oblysynda salynyp jatqan tuzdy tiskebasar shyǵaratyn zaýyt máselesi qaraldy.