Elimizde emhanalardyń jumysyn baǵalaý júıesi ózgeredi
ASTANA. KAZINFORM – Patsıent beıindi mamannyń qabyldaýyn qansha ýaqyt kútedi, qajetti dıagnostıkalyq zertteýlerden ýaqytyly óte me, statsıonardan shyqqannan keıin ári qaraı baqylaýda bola ma? Osy jáne basqa da kórsetkishter medıtsınalyq-sanıtarııalyq alǵashqy kómek (MSAK) uıymdarynyń jumysyn baǵalaýdyń biryńǵaı júıesine engiziledi.
MSAK standartynyń jańa redaktsııasy medıtsınalyq kómektiń qoljetimdiligi men sapasyn arttyrýǵa, profılaktıkalyq jumysty kúsheıtýge jáne patsıentti medıtsınalyq kómektiń barlyq kezeńinde úzdiksiz súıemeldeýdi qamtamasyz etýge baǵyttalǵan.
Emhanalardyń jumysyn baǵalaý úshin 100 baldyq biryńǵaı júıe engiziledi. Kórsetkishterdi esepteý densaýlyq saqtaý salasynyń aqparattyq júıelerindegi derekter negizinde toqsan saıyn avtomatty túrde júrgiziledi.
– Biz emhanalardyń jumysyn formaldy baǵalaýdan bas tartýymyz kerek. Basty krıterıı – kórsetilgen medıtsınalyq kómektiń sapasy, ıaǵnı patsıenttiń naqty qandaı nátıjege qol jetkizgeni: qajetti mamanǵa qanshalyqty jyldam barǵany, dıagnostıkadan ýaqtyly ótkeni jáne emdelgennen keıin baqylaýdy jalǵastyrǵany. Ol úshin derekter avtomatty túrde ári obektıvti qalyptasýy kerek. Qazirgi tańda aqparat birneshe tsıfrlyq resýrsta ornalasqan. Sondyqtan bizdiń mindetimiz – olardy ıntegratsııalap, biryńǵaı baǵalaý júıesin qalyptastyrý, – dedi Densaýlyq saqtaý mınıstri Aqmaral Álnazarova.
Jeke blok aýrýlardyń profılaktıkasy men olardy erte anyqtaýǵa arnalǵan. Balalardy josparly vaktsınatsııamen qamtý, skrınıngterden ótý, sondaı-aq sút bezi obyryna, jatyr moıny obyryna jáne kolorektaldyq obyrǵa kúdik bolǵan jaǵdaıda dıagnostıkany ýaqytyly aıaqtaý kórsetkishteri eskeriledi.
Patsıentterdiń keri baılanysy da baǵalaýǵa engiziledi. Atap aıtqanda, medıtsınalyq kómektiń qanshalyqty qoljetimdi ári túsinikti bolǵany, patsıent óziniń dıagnozy men aldaǵy emdeý josparyn túsine me, kórsetilgen medıtsınalyq kómekten keıin densaýlyq jaǵdaıynyń jaqsarǵanyn baıqaı ma – osy máseleler eskeriledi.
QR Densaýlyq saqtaý mınıstrligi málimetinshe, standarttyń jańa redaktsııasynda MSAK deńgeıinde kórsetiletin medıtsınalyq kómektiń kólemi de naqty aıqyndalady. Tegin medıtsınalyq kómektiń kepildik berilgen kólemine (TMKKK) kiretin qyzmetter patsıenttiń MÁMS júıesindegi mártebesine qaramastan kórsetiledi.
Olardyń qatarynda bastapqy býyn mamandarynyń qabyldaýy, dárigerge deıingi tekserý, jedel medıtsınalyq kómek kabınetiniń qyzmetteri, jalpy qan jáne zár taldaýlary, EKG, flıýorografııa jáne tizbede kózdelgen basqa da zertteýler bar.
Patsıent tek nátıjelerdi alý úshin emhanaǵa qaıta kelýge májbúr bolmaýy úshin tekserý nátıjeleri men alǵashqy qabyldaý qorytyndysy boıynsha usynymdar medıtsınalyq tsıfrlyq júıe arqyly patsıenttiń jeke kabınetine avtomatty túrde jiberiledi.
MÁMS júıesinde MSAK deńgeıinde konsýltatsııalyq, dıagnostıkalyq, profılaktıkalyq jáne emdeý qyzmetteriniń keń spektri qoljetimdi. Olardyń qatarynda zerthanalyq dıagnostıka, EKG, mammografııa, holterlik jáne arterııalyq qysymdy táýliktik monıtorıngileý, patronaj, qashyqtan konsýltatsııa berý jáne mobıldik brıgadalardyń jumysy bar.
Emhanaǵa baryp, dárigerge jazyla almaı júrgenderge qatysty shara qabyldanatynyn jazǵan edik.
