Elimizde elektrondy saýda damyp jatyr: tutynýshylar kóbine qandaı zattardy onlaın satyp alady
ASTANA. KAZINFORM – Elimizde elektrondy saýda qarqyndy damyp keledi. Úsh jyl ishinde naryq kólemi 2023 jylǵy 2,4 trln teńgeden 2025 jyly 3,7 trln teńgege deıin ósip, 50%-dan astam ósimdi kórsetti. Sonymen qatar bólshek saýdanyń jalpy kólemindegi onlaın-saýdanyń úlesi 12,7%-dan 14,3%-ǵa deıin artty. Bul týraly Saýda jáne ıntegratsııa mınıstrligi habarlady.
Naryqtyń negizgi draıveri - marketpleıster. Búginde olardyń úlesine bólshek elektrondy saýdanyń jalpy kóleminiń 86%-y tıesili. Platformalar saýdanyń jańa formatyn qalyptastyrdy. Endi satyp alýshy qajetti taýarǵa birneshe ret basý arqyly qol jetkizse, kásipker úshin búkil el boıynsha mıllıondaǵan áleýetti klıentke tikeleı shyǵýǵa múmkindik paıda boldy.
Tutynýshylardyń satyp alý daǵdylary da aıtarlyqtaı ózgerip keledi. Búginde onlaın arqyly tek elektronıka nemese kıim-keshek qana satyp alynbaıdy. 2025 jyly marketpleısterdegi barlyq satylymnyń 17,1%-y telefondar men gadjetter, 12,4%-yn kıim, aıaq kıim jáne sport taýarlary, 12,1%-y úı men saıajaıǵa arnalǵan taýarlar, 10,3%-y turmystyq tehnıka, al 7,4%-y azyq-túlik. Bul elektrondyq saýdanyń qazaqstandyqtardyń kúndelikti tutyný mádenıetiniń bir bóligine aınalyp kele jatqanyn kórsetedi.
Sonymen qatar taýarlardy jetkizý tásilderi de ózgerip jatyr. Buǵan deıin satyp alýshy tapsyrysyn birneshe kún kútýge daıyn bolsa, búginde jekelegen taýar sanattary boıynsha ekspress-jetkizý bir saǵattan az ýaqytty alady. Azyq-túlik pen kúndelikti tutyný taýarlaryn jyldam jetkizýdi qamtamasyz etetin e-grocery baǵyty da qarqyndy damyp jatyr. Tek 2025 jyly Almaty, Astana, Qaraǵandy jáne Aqtóbe qalalarynda bes Dark Store jobasy iske qosyldy. Al tapsyrystardy alýdy odan ári yńǵaıly etý úshin marketpleıster 2 300 jańa postamat ornatty.
Elektrondyq saýda endi jaı ǵana taýar satyp alýdyń jańa tásili emes. Bul tutynýshylardyń ádetterin ózgertip, bızneske jańa naryqtarǵa shyǵýǵa múmkindik beretin, saýdany jyldam, qoljetimdi ári yńǵaıly etetin ekonomıkanyń tolyqqandy salasyna aınaldy.
Elimizde biryńǵaı ulttyq elektrondy kitaphana qurylatynyn jazǵan edik.
