Elimizde elektrondy bilezikterdi qoldaný jaǵdaılarynyń sany artyp keledi
ASTANA. KAZINFORM – Elimizde sottar qamaýǵa alýdyń balama bultartpaý sharalaryn keńinen qoldana bastady. Bul týraly Joǵarǵy sot tóraǵasy Aslambek Merǵalıev málim etti.

- Halyqaralyq standarttarǵa sáıkes, sotty kútip turǵan adamdardy qamaýǵa alý jalpy ereje bolmaýy kerek. Qylmystyq-protsestik kodekste qamaýǵa alýdan góri qatańyraq bultartpaý sharasyn tańdaý kózdelgen. Degenmen, elimizde sotqa deıin qamaýǵa alynǵandardyń sany joǵary bolyp qalýda – jyl saıyn shamamen 11 myń adam. Olardyń úshten ekisi ǵana naqty bas bostandyǵynan aıyrýǵa sottalady, - dedi ol elordada ótken «Júrgizilgen sot reformasynyń ózekti máseleleri» taqyrybyndaǵy dóńgelek ústel barysynda.
Joǵarǵy sot tóraǵasy tergeý sottary tergeýdiń jeteginde júredi jáne qamaýǵa alýǵa sanktsııa beredi degen zańger qaýymnyń synymen ishinara kelisti.
- Qoldanylǵan bultartpaý sharalaryn sottyń sanktsııasymen salystyratyn bolsaq, qamaýǵa alý úlesi - 95, úıqamaqqa alý - 4, kepildik odan da tómen – 1 paıyz. Ótken jyly tergeý organdary 639 adamǵa úıqamaqqa alý, 34 kúdiktige kepildik berý týraly ótinishhat bildirse, sottar qamaýda ustaýǵa sanktsııa berýden bas tarta otyryp, tıisinshe 2 786 jáne 283 adamǵa úıqamaq jáne 283 adamǵa kepildik berýdi óz betinshe tańdaǵan, - dedi Joǵarǵy sot tóraǵasy.
Aslambek Merǵalıevtiń atap ótýinshe, Joǵarǵy sottyń bastamasymen qolǵa alynǵan elektrondy baqylaý quraldaryn qoldanýdy keńeıtý jobasy oǵan mańyzdy serpin berdi. Elektrondy bilezikterdi qoldanǵandar sany 14 esege jýyq (68-den 954-ke deıin) artty.
- Memleket basshysynyń tapsyrmasy boıynsha Joǵarǵy sot elektrondy baqylaý quraldaryn qoldaný praktıkasyn keńeıtý jóninde usynystar daıyndady. Probatsııalyq baqylaýdaǵy sottalǵandarǵa qatysty tıisti tehnologııalar belsendi qoldanylady. Qylmystyq atqarý júıesinde sottalǵandy 2 metrge deıingi dáldikpen turaqty baqylaýǵa múmkindik beretin 2,5 myń jınaq bar, - dedi ol.
Bıylǵy jyldyń 10 aıynda ǵana sottar zań buzǵan adamdarǵa 505 ret elektrondy bilezik taǵý sharasyn qoldanǵany týraly jazdyq.