Elimizde elektrondy baqylaý bilezikterin qoldaný kórsetkishi 4 ese artty
ASTANA. KAZINFORM – Joǵarǵy Sot Tóraǵasy Aslambek Merǵalıev respýblıkanyń sot korpýsymen ótken 9 aıdaǵy sot tóreligin júzege asyrý qorytyndysy boıynsha keńes ótkizdi. Bul týraly vedomstvonyń baspasóz qyzmeti habarlady.
Onyń jumysyna Joǵarǵy Sottyń sot alqalarynyń tóraǵalary Nurserik Sháripov, Nazgúl Rahmetýllına jáne Aslan Túkıev, Sot ákimshiliginiń basshysy Naıl Ahmetzakırov, VKB arqyly – oblystyq jáne oǵan teńestirilgen sottardyń basshylyǵy qatysty.
A.Merǵalıev óz sózinde Memleket basshysynyń tapsyrmasy boıynsha júrgizilip jatqan ózgerister sýdıalardyń táýelsizdigin qamtamasyz etýge, sot korpýsyn joǵary bilikti zańgerlermen nyǵaıtýǵa jáne sot protsesinde azamattar men kásipkerlerdiń kepildikterin kúsheıtýge baǵyttalǵanyn atap ótti.
Baıandamashy alqabıler sottylyǵynyń keńeıýine baılanysty olardyń qatysýymen qaralǵan qylmystyq isterdiń eki esege ulǵaıǵanyn, sheshim qabyldaýdyń ashyqtyǵyn qamtamasyz etý jáne sot qatelerin azaıtý úshin aýyr jáne asa aýyr qylmys jasaǵany úshin sottalǵandardy shartty túrde merziminen buryn bosatý jáne bas bostandyǵynan aıyrýdy neǵurlym jeńil jazamen aýystyrý týraly ótinishhattar berýdi pysyqtaý jumystary qolǵa alynǵanyn aıtty.
Baqylaý qurylǵylaryn qoldanýdyń 4 esege óskeni týraly aıtyldy: 2023 jyly elektrondy bileziktermen úıqamaqqa alý úshin 68 adamǵa (úıqamaqtaǵylardyń 20%), al 2024 jyly – 263 ustalǵan adamǵa (60%) sanktsııa berilgen.
Óreskel zań buzýshylyqtar týraly materıaldardy (23 tulǵaǵa qatysty 11 is boıynsha) Sot jıýrıine joldaý týraly aıta kele, baıandamashy zańnyń ústemdigi qaǵıdatyn qatań saqtaýǵa, sot praktıkasynyń birlikti qamtamasyz etýge jáne isterdi qaraý merzimderine toqtaldy.
Joǵarǵy Sot Tóraǵasy azamattyq ister boıynsha tatýlastyrýdyń tıimdiligin (42%), ońaılatylǵan is júrgizý tártibimen qaralǵan isterdiń kóbeıgenin, turǵyn úı, jer, eńbek jáne saqtandyrý daýlary boıynsha sot qateleriniń azaıǵanyn atap ótti.
Qoǵamda bolyp jatqan oqıǵalarǵa be-jaı qaramaıtyn adamdardyń áleýmettik quqyqtaryn qorǵaý isteri boıynsha, spıker sottardyń jeke uıǵarymdar boıynsha sharalar qabyldaýy qajettigin atap ótti.
Apellıatsııanyń tıimdiligin arttyrýǵa, kassatsııalyq tártipte anyqtalǵan qatelerge basa nazar aýdara otyryp, sýdıalar úshin oqytý semınarlary men trenıngterin júıeli túrde ótkizýge nazar aýdaryldy.
Ákimshilik talap qoıýlardyń ósýine qatysty (3,3%) memlekettik basqarý sapasyn arttyrýdaǵy reformanyń tıimdiligi atap ótildi: tatýlastyrý jáne suratýlar 5,4%-ǵa óse túsken, Joǵarǵy Sot 2 bıýlleten, 9 taldaý jáne sot praktıkasyna qorytýlar shyǵardy.
Joǵarǵy Sot Tóraǵasy, sóziniń sońynda, sot sheshimderiniń ádildigin qamtamasyz etý, isterdi muqııat qaraý, onyń ishinde, ınvestorlar men bıznestiń quqyqtaryn qorǵaý, sottardaǵy sybaılas jemqorlyqtyń kez kelgen kórinisterin joıý, jańa Sýdıalyq ádep kodeksiniń normalaryn múltiksiz saqtaý, sottyń keshendi jumysy týraly buqaralyq aqparat quraldary men áleýmettik jelilerde kóbirek aıtý qajettigine nazar aýdardy.
Sotqa deıin qamaýǵa alynǵandarǵa elektrondy bilezik taǵylýy múmkin ekenin jazǵan bolatynbyz.
