Elimizde elektromobıl qurastyrýshylaryn daıarlaý ortalyǵy ashyldy
Elimizde tuńǵysh ret elektromobılderge qyzmet kórsetetin ınjenerlerdi daıarlaý ortalyǵy ashyldy. Munda stýdentter elektr stantsııalary men akkýmýlıatorlyq batareıalardy jóndeýge mashyqtanady, dep jazady 24.kz.
Zamanaýı mashına jasaý mektebi Óskemende ornalasqan. Joba Qazaqstan-Qytaı áriptestigi jáne memleketaralyq kelisimder aıasynda júzege asyryldy.
Avtopılottyq kólikter qala kóshelerimen júredi. Al jasandy ıntellekt jol-kólik oqıǵalarynyń aldyn alady. Aqyldy mashınalarǵa arnalǵan baǵdarshamdar da daıyn.
- Osyndaı smart tehnologııalyq kólikterge arnalǵan sheberhana qurý óte mańyzdy. Ol arqyly ıntellektýaldy júıeni bizdiń óńirde ǵana emes, barlyq aımaqta damytýǵa múmkindik týady. Bul óz kezeginde qozǵalys qaýipsizdigin edáýir arttyrady, - deıdi PHD doktory Samat Baıgereev.
Osylaısha qazaq-qytaı áriptestigi aıasynda Óskemende elimizdegi alǵashqy elektromobıl qurastyrýshylardy daıarlaý ortalyǵy quryldy.
Buǵan deıin otandyq ǵalymdar toby kórshi elde taǵylymdamadan ótti. Mine tehnıka ǵylymdarynyń kandıdaty, professor Marat Muzdybaev stýdentterge lıtıı-ıondy batareıalarǵa qyzmet kórsetýdiń qyr-syryn úırete bastady.
- Bul akkýmýlıatorlyq batareıalardyń qurylymdaryn zertteý jáne dıagnostıkalaý boıynsha oqytý platformasy. Munda akkýmýlıatordy ǵana emes, qosalqy jabdyqtardy da meńgeremiz. Jańa júıeni endi úırenip jatqan stýdentter úshin bul óte mańyzdy, - deıdi professor, tehnıka ǵylymdarynyń kandıdaty Marat Muzdybaev.
Álbette, otandyq tehnıkter úshin álemdik úrdisterdi qýyp jetý mańyzdy. Qazirdiń ózinde naryqta satylǵan árbir besinshi kólik elektr qozǵaltqyshpen júredi. Álemde elektromobılder satylymy 34%-ǵa ósti.
- Aldaǵy ýaqytta Aqtóbede robototehnıka jáne munaı-gaz óndirisi salasynda mashına jasaý boıynsha osyndaı ortalyq ashylady. Sondaı-aq Almaty jáne Astana qalalarynda Kompıýterlik ınjenerııa boıynsha óndiristik ortalyqtar ashýdy josparlap otyrmyz. Al Óskemendegi sheberhana jyl saıyn júzdegen mashına jasaýshylar men bilikti mamandardy daıyndaýǵa múmkindik beredi, - deıdi QR Ǵylym jáne joǵary bilim mınıstri Saıasat Nurbek.