Elimizde elektr jaryǵynyń shekti tarıfi ózgerýi múmkin
ASTANA. KAZINFORM — Qazaqstandyq 36 elektr energııasyn óndirýshi uıym Energetıka mınıstrligine 2025 jylǵy 1 aqpannan bastap elektr energııasyn óndirýge arnalǵan shekti tarıfti túzetýge qatysty ótinim berdi.
Elektr energııasyn óndirýshi uıymdardyń málimetteri boıynsha tarıfke túzetý engizýdiń qajettiligi kompanııalardyń shyǵyndarynyń ósýimen baılanysty.
Shyǵyndardyń ósýiniń negizgi faktorlary: Óndiristik personaldyń jalaqysyn kóterý.
2024 jyly ortasha jalaqy 18%-ǵa artyp, 425 myń teńgeni qurady. Bıyl taǵy 15-20%-ǵa ósirý josparlanýda, osylaısha ortasha jalaqyny 490 myń teńgege deıin kóterý kútilýde.
Mınıstrlikten habarlaǵandaı, energetıka sektory bilikti kadrǵa tapshy. Energetıka kásiporyndarynda shtat sany shamamen 57 myń adam bolǵan kezde 4,5 myń maman jetispeıdi. 2024 jylǵy 1 qańtardaǵy jaǵdaı boıynsha qyzmetkerlerdiń naqty sany 52,5 myń adamdy qurady. Jalaqyny kóterý saladaǵy mamandardy tartýǵa jáne ustaýǵa baǵyttalǵan.
Sonymen qatar, otyn satyp alý jáne kómir men gazdy tasymaldaý shyǵyndary artty. Sondaı-aq, tarıfti túzetýge yqpal etetin faktorlardyń biri jóndeý naýqanyn júrgizý jáne energııa óndirýshi obektilerdiń, onyń ishinde metaldyń qymbattaýyna baılanysty obektilerdiń turaqty jumysyn qamtamasyz etý úshin qajetti materıaldar men jabdyqtardy satyp alý jáne tasymaldaý qunynyń ósýi.
Sondaı-aq, jańa úsh energııa óndirýshi uıym energııa óndirýshi uıymdardyń tizimine qosylý boıynsha ótinim berdi, olar úshin shekti tarıfterdi belgileý qajettigi bar.
— Aldyn ala esepteýler boıynsha biryńǵaı satyp alýshy úshin elektr energııasynyń qunyna tarıfterdi túzetýdiń áseri kVt/saǵ úshin shamamen 2 teńgeni quraıtynyn kórsetedi. Qazir energııa óndirýshi uıymdardyń ótinimderi qaralyp jatyr. Barlyq usynys tutynýshylardyń múddesi men salanyń turaqty damý qajettiligi arasyndaǵy tepe-teńdikti qamtamasyz etý úshin muqııat taldanady, — delingen Energetıka mınıstriniń buıryq jobasynda.
Qujat jobasy «Ashyq NQA» portalynda jarııalandy jáne 22 qańtarǵa deıin qoǵamdyq talqylaýǵa usynylyp otyr.
Ótken jyldyń aıaǵynda Úkimet basshysynyń orynbasary elimizde elektr energııasyna tarıftiń ósýine pikir bildirgen edi.