Elimizdiń 13 óńirinde 62 elektrli kólikterdi qýattandyrý stantsııasy jumys istep tur
ASTANA. KAZINFORM - Búgingi tańda elimizdiń negizgi avtomobıl baǵyttarynyń boıynda Qazaqstannyń 13 óńirinde ornalasqan 62 elektr kólikterin qýattandyrý stantsııasy (EQS) jumys isteıdi, dep habarlaıdy QR Kólik mınıstrliginiń baspasóz qyzmeti.
Olardy damytý óńirler arasynda qatynaıtyn elektromobıl ıeleri úshin qolaıly jaǵdaı jasaýǵa baǵyttalǵan.
Stantsııalardyń eń kóp sany Almaty jáne Jambyl oblystarynda — 12-den, sondaı-aq Aqmola jáne Qaraǵandy oblystarynda — 8-den ornalasqan. EQS Atyraý, Jetisý, Batys Qazaqstan, Qostanaı, Qyzylorda, Mańǵystaý, Pavlodar, Soltústik Qazaqstan jáneTúrkistan oblystarynda da jumys isteıdi. Atap aıtqanda, jeli eldiń ártúrli kólik baǵyttaryn qamtıdy. Mysaly, «Astana – Almaty» avtojolynda 13 stantsııa, «Astana – Petropavl» baǵytynda 7, «Almaty – Óskemen» trassasynda 6 stantsııa ornalasqan.
Halyqaralyq kólik dálizderi boıynda zarıadtaý ınfraqurylymyn damytýǵa erekshe kóńil bólingen. Atap aıtqanda, «Batys Eýropa – Batys Qytaı» halyqaralyq avtojoly boıynda 19 elektr zarıadtaý stantsııasy ornatylǵan.
Ornatylǵan EQS-tardyń qýaty 60-tan 320 kVt-qa deıingi aralyqty quraıdy. Bul elektromobıl ıelerine negizgi respýblıkalyq jáne halyqaralyq baǵyttar boıynsha saparlaryn aldyn ala josparlaýǵa múmkindik beredi.
EQS jelisin odan ári keńeıtý jumystary belsendi júrip jatyr. 2026 jylǵa arnalǵan josparda halyqaralyq jáne respýblıkalyq mańyzy bar avtomobıl joldarynyń boıynda 27 jańa avtojanarmaı quıý stantsııasyn salý kózdelgen, al elektr kólikterin qýattandyrý stantsııalaryn sol josparlanǵan nysandarda ornalastyrý qarastyrylǵan. Mysaly, «Batys Eýropa – Batys Qytaı» avtojolynyń boıynda 7 EQS ornatý josparlanyp otyr.
-Kólik mınıstrligi jol salasyndaǵy uıymdarmen jáne jergilikti atqarýshy organdarmen birlesip, jańa obektiler salý jáne qoldanystaǵylardy Ulttyq standarttyń talaptaryna sáıkestendirý máseleleri boıynsha jol boıyndaǵy servıs nysandarynyń jeke ınvestorlary men ıelerimen jumys júrgizý ústinde,-delingen habarlamada.
Osyǵan deıin kóliktiń qandaı jaǵdaıda aıyp turaǵyna jetkiziletini týraly jazdyq.
