Elimizde ekologııalyq jobalardaǵy áıelder úlesi artyp keledi

ASTANA. KAZINFORM – Óńirlik ekologııalyq sammıtte turaqty damý jáne klımattyń ózgerýine qarsy kúrestegi burymdylardyń róli talqylandy.

QR eńbek jáne halyqty áleýmettik qorǵaý birinshi vıtse-mınıstri Erbol Tuıaqbaevtyń málimdeýinshe, Qazaqstan ekonomıkasynda 4,5 mln qyz-kelinshek jumys isteıdi.

— Ótken jyly arnaıy baǵdarlama aıasynda 475 myń áıel jumysqa ornalastyryldy. Al 30 myń áıel kásipkerlik negizderi boıynsha oqýdan ótti, — dedi ol.

Vıtse-mınıstrdiń sózinshe, názik jandylar da — eldiń turaqty damýy úshin mańyzdy tirek.

— Turaqty damýǵa qatysty salalarda, mysaly, sý resýrstaryn basqarý, aýyl sharýashylyǵy, ekologııalyq jobalar tárizdi sektorlarda áıelderdiń belsendiligi kúsheıip, úlesi artyp jatyr. Qazaqstan áleýmettik jáne genderlik teńdik, tabıǵı resýrstardy tıimdi basqarý ustanymdaryn halyqaralyq deńgeıde tanytyp keledi, — dedi Erbol Tuıaqbaev.

Aıta keteıik, buǵan deıin genderlik teńdik máselesindegi jahandyq úrdister men Qazaqstandaǵy jaǵdaı týraly jazǵanbyz.