Elimizde egizder men bir týǵandar áskerı boryshyn qalaı óteıdi

Biri – ekonomıst, biri – IT mamany

Aıdos jáne Jandos Baýbek Otan aldyndaǵy boryshyn Aqtóbedegi 30328 áskerı bóliminde ótep júr. Olar osy óńirdiń, sonyń ishinde Hromtaý qalasynyń turǵyndary. Orta mektepti bitirgen soń Hromtaý taý-ken joǵary tehnıkalyq kolledjine oqýǵa túsedi. Aıdos esep-aýdıt mamandaǵyn, al Jandos tehnıkalyq baǵdarlamashy mamandyǵyn meńgerdi. Bir kolledj ishinde eki mamandyqty meńgergen egizder keıin eki túrli joǵary oqý ornyn tańdady. Aıdos Baýbek Q.Jubanov atyndaǵy Aqtóbe óńirlik ýnıversıtetiniń esep jáne baqylaý mamandyǵyn, al Jandos Baýbek Qazaq-orys halyqaralyq ýnıversıtetiniń IT salasyna oqýǵa tústi. Keıin bul joǵary oqý orny qyzmetin toqtatyp, Oral qalasyna aýysty. Al Aıdos oqýyn syńarynan buryn aıaqtap, jumys istep, magıstratýraǵa qujat tapsyrdy. Alaıda oqýǵa túse almaı, byltyr kúzde ásker qataryna qabyldandy. Otbasy Aıdos pen Jandosty qatar jiberýge sheshim qabyldaǵan.

– Alǵashqy áskerı daıyndyq pánin oqyǵan kezde AK-74 avtomatynyń úlgisin shashyp, jınaýdy úırendik. Al sarbaz atanǵan soń naǵyz qarýdy qolǵa ustap, oqý-jattyǵýǵa qatystyq. Ár sarbaz kelgen kúnnen bastap áskerı tártipke úırenedi. Tańerteń saǵat 06:00-de turady, jattyǵýǵa shyǵady. Tańǵy jattyǵýǵa 40-50 mınýt ýaqyt beriledi. Odan keıin jýynyp-shaıynyp, tańǵy asqa jınalady. Tústen keıin oqý bólmesinde bilimin jetildiredi. Sonymen birge áskerı tehnıkanyń qurylymy men kútip ustaýdy úıretedi. Keshki astan keıin birer saǵat bos ýaqyt bar. Onda kitap oqımyz, sportpen shuǵyldanamyz, - dedi 30328 áskerı bólimi ekinshi motoatqyshtar rotasynyń kózdeýshi operatory Aıdos Baýbek.

Sarbazdardyń taǵy bir mindeti – jasaqqa túsý. Ol kezde sarbazdardyń janynda jaýapty áskerı qyzmetshiler de bolady. Máselen kúzetke tórt sarbaz, eki áskerı qyzmetshi bólinedi. Saqshylar, ıaǵnı, tórt sarbaz eki-ekiden munaranyń basyn shyǵyp, árbir eki saǵat saıyn aýysyp turady. Munda rota boıynsha kezekshilik, rota boıynsha táýliktik kezekshilik te bar. Rota boıynsha táýliktik kezekshilikke sarbazdar shyǵady. Rota boıynsha kezekshilik serjanttar men bólimshe komandırleri arasynda taǵaıyndalady. Rota boıynsha táýliktik kezekshilikke túskender tazalyq pen tártipke, al rota boıynsha kezekshilikke túsken áskerıler qarý qoımasyna da jaýapty bolady.

– Ata-anama magıstratýraǵa oqýǵa túse almaǵan kúni áskerge baratynymdy aıttym. Olar kelisim berdi. Alǵashynda Aqtaýdaǵy shekara qyzmetine joldaǵanymen, salmaǵym jetpedi. Keıin desanttyq-shabýyldaý áskerıleri qyzmetine boıymyz sáıkes kelmedi. Sóıtip Aqtóbede qaldyq. Meniń mańdaıymda qal, kóz aımaǵymda tyrtyq bar. Eger bas kıim kıip tursaq bizdi ajyratý qıyn. Buryn kolledjde oqyp júrgen kezde ornymyzdy almastyryp júretin edik. Ýaqyt óte kele oqytýshylar tanyp, bárin qoıyp kettik. Biraq áskerde tártip ortaq, - dedi Aıdos Baýbek.

Jandos Baýbek shyn máninde áli joǵary oqý ornyn aıaqtamady. Aıdos ásker qataryna shaqyrylǵanda Jandos ta qatar júrýdi jón kórdi. Qazir ekeýi bir-birine tirek, qoldaý.

– Ásker bizdi tártipke, qarýdy tanyp, qoldanýdy úıretti. Áskerı shendi de meńgerdik. Biraq biz bolashaǵymyzdy áskerı salamen baılanystyrmaımyz. Meniń kásip bastaǵym keledi, - dedi Aıdos.

Al Jandos IT maman daıyndaıtyn joǵary oqý ornyna sertıfıkat alsam degen úmitte. Tipti oqý oryndaryn da tańdap qoıǵan.

– Biz de sarbazdardyń ómiri týraly basqasha oıladyq. Sebebi túrli qaıǵyly jaǵdaı týraly estidik, qıyndyqtar jaıy aıtyldy. Al áskerı qyzmetke kirisken kezde tártipke baǵyný men tabandylyq qajet ekenin bildik. Tańerteń erte turý, tańǵy jattyǵý... Kúsh túsken kezde keıbiri «qaıdan keldim» dep oılap, óz-ózin ishten mújýi múmkin. Biz de muny bastan ótkerdik. Demalys kúni úıdegilerge qońyraý shalǵan kezde «meni alyp ketshi» dep aıtatyn edik. Bitpeı qalǵan jumys pen kóp sharýany oılaıtynbyz. Keıin úırendik, anamyzǵa habarlasyp, kúndelikti qyzyqty sátterdi aıtyp berdik. Al qazir apta saıyn qońyraý shalǵan kezde ne aıtarymyzdy bilmeı qalamyz, - dedi egiz sarbazdar.

Egizder de, kórshiler de bolady

30328 áskerı bóliminde úsh egiz áskerı boryshyn ótep júr. Áskerı bólim komandıriniń tárbıe jáne ıdeologııalyq jumystar jónindegi orynbasary Nurbolat Ysqaqovtyń aıtýynsha, egizder árdaıym bir-birin qoldap júredi.

– Egizderdi bir-birinen ajyratpaımyz, birge júrýine múmkindik jasaımyz. Bir bólimshege ornalasady, jatyn orny da bir jerde. Egizderden bólek bir týǵandar da keledi. Olar bóleler, tipti kórshiler. Bir-birine járdem beretin bolǵan soń birge júredi. Qazirgi sarbazdar myqty. Oqyǵan, kópti kórgen, tehnıkany jetik meńgergen. Tek birinshi úıin saǵynady. Ekinshiden, uıaly telefonǵa úırengen urpaq. Al munda ishki tártipke baǵynady, sabaǵyn oqıdy, jattyǵýyn jasaıdy. Úshinshiden, tártipke baǵyný. Tańǵy saǵat 06:00-de turyp, júgirip, keshki saǵat 22:00-de uıyqtaýǵa qınalady. Bir aıda alǵashqy áskerı daıyndyqty úırengen soń ant qabyldap, ár bólimshege taraıdy. Mamandyq boıynsha daıyndyqqa kirisedi. Máselen pýlemetshi óz mamandyǵyn bir aı boıy úırenedi, - dedi Nurbolat Ysqaqov.

30328 áskerı bólimi komandıriniń tárbıe jáne ıdeologııalyq jumystar jónindegi orynbasarynyń aıtýynsha, aýyl balasy áskerı ómirge beıim keledi. Olar úshin tańda erte turý esh qıyndyq týǵyzbaıdy. Al qala balasy bolsa tehnologııany jetik meńgergen.

– Jastar – óte aqyldy. 20 jyldan beri áskerı qyzmetshilermen jumys istep júrgen maman retinde aıtar bolsam, buryn báriniń dene daıyndyǵy shymyr bolatyn. Qazir shymyr ári bilimdi urpaq ósken, - dedi ol.

Aıta keteıik, áskerı bólimde beınebaqylaý kamerasy bar. Sarbazdar ár senbi jáne jeksenbi saıyn uıaly telefon arqyly otbasyna habarlasady. Ári kúzde shaqyrylǵandar kóktemde shaqyrylǵan sarbazdarmen múlde kezdespeıdi.

Eske salsaq, bıyl Aqtóbede myńnan astam azamat áskerge shaqyrylady. 18-27 jas aralyǵyndaǵy jas jigitter elimizdiń birneshe óńirine jiberiledi.