Elimizde egis alqabynyń jalpy kólemi 23,7 mln gektarǵa jetti

ASTANA. KAZINFORM – Bıyl elimizdegi egis alqabynyń kólemi 23,7 mln gektarǵa jetkiziledi. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

— Memleket basshysynyń tapsyrmasyna sáıkes, aýyl sharýashylyǵy daqyldaryn ártaraptandyrý boıynsha júıeli jumys júrgizilýde: nátıjesinde 2 jyl ishinde bıdaı alqaby 750 myń gektarǵa qysqardy. Azyqtyq jáne maıly daqyldar alqaptary aǵymdaǵy jyly 3,3 mln gektar, kúnbaǵys alqaby alǵash ret 1,4 mln gektardy quraıdy. Dándi jáne burshaq daqyldaryn 16,6 mln gektarǵa ornalastyrý josparlanýda. Maqta alańy 135 myń gektar bolmaq, onyń ishinde dástúrli ádispen ósiriletin alań 21,4 myń gektarǵa qysqaryp, 85 myń gektardy quraıdy», — dedi ol kóktemgi dala jumystary jaıly baıandamasynda.

Sondaı-aq mınıstr bıyl jalpy egis alqabynyń aýmaǵy ulǵaıǵanyn atap ótti.

— Oblys ákimdikteriniń derekterine sáıkes, bıyl jalpy egis alqaby 23,7 mln gektardy quraıdy, bul ótken jylmen salystyrǵanda 413 myń gektarǵa kóp, - dedi Aıdarbek Saparov.

Osyǵan deıin habarlaǵanymyzdaı, Qazaqstannyń ońtústik óńirlerinde kóktemgi egis naýqany aıaqtalýǵa jaqyn.