Elimizde eGov 3.0 iske qosylmaq: memlekettik qyzmetter qalaı ózgeredi

Paneldik sessııany Qazaqstan Respýblıkasy JITsDM Birinshi vıtse-mınıstri Rostıslav Konıashkın ashty. Talqylaýǵa sondaı-aq «Ulttyq aqparattyq tehnologııalar» AQ basqarma tóraǵasynyń mindetin atqarýshy Shyńǵys Orazálimov, tsıfrlyq úkimet jáne tsıfrlyq transformatsııa salasyndaǵy sarapshy Rıchard Kırbı, Grýzııanyń Tsıfrlyq basqarý agenttiginiń tóraǵasy Sandro Tsırekıdze, Eýrazııalyq damý bankiniń Tsıfrlyq bastamalar dırektsııasynyń basqarýshy dırektory Dáýren Raqymjanov qatysty. Sessııany TrustExam.ai kompanııasynyń CEO-sy ári teń quryltaıshysy Ersultan Ermanov júrgizdi.

Qatysýshylar memlekettik tsıfrlyq servısterdiń kelesi býyny qandaı bolýy kerektigin jáne jasandy ıntellekt, derekter men zamanaýı tehnologııalyq sheshimder azamattar men bıznestiń memleketpen ózara is-qımylyn qalaı ózgerte alatynyn talqylady.

Sessııanyń negizgi taqyryby eGov 3.0 tujyrymdamasy boldy. Bul memlekettik qyzmetterdi onlaın usynýmen shektelmeı, paıdalanýshynyń qajettiligine beıimdelgen, ózara baılanysqan jáne proaktıvti servısterdi qalyptastyrýdy kózdeıdi. QR JITsDM Birinshi vıtse-mınıstri Rostıslav Konıashkınniń aıtýynsha, eGov 3.0-di damytý paıdalanýshy ınterfeısin jańartýmen ǵana shektelmeıdi. Eń aldymen, memlekettik qyzmetterdi ázirleý jáne usyný tásili ózgeredi.

— Jańa eGov 3.0, shyn máninde, portal dızaınyn jańartýmen shektelmeı, QazTech jańa tehnologııalyq platformasy negizinde júıeni tolyq qaıta qurýdy kózdeıdi. Jańa arhıtektýra júıeniń ónimdiligi men turaqtylyǵyn arttyryp, jańa qyzmetterdi jyldam engizýge múmkindik beredi. QazTech — ınfraqurylymdy, qaýipsizdikti, ázirleý quraldaryn jáne daıyn komponentterdi biriktiretin tsıfrlyq memlekettiń tehnologııalyq negizi. Osynyń arqasynda memlekettik servısterdi biryńǵaı standarttar negizinde jyldamyraq ázirleýge bolady, — dedi Rostıslav Konıashkın.

Sessııa barysynda jańa tásildiń negizgi elementteriniń biri retinde jasandy ıntellektini qoldaný máselesine de erekshe nazar aýdaryldy. Jasandy ıntellekt tehnologııalary paıdalanýshy qajetti qyzmetti katalogtan ózi izdeıtin modelden adamnyń qyzmetti alý barysyndaǵy barlyq kezeńde tsıfrlyq súıemeldeýge múmkindik beretin tásilge kóshýge jol ashady. «Ulttyq aqparattyq tehnologııalar» AQ Basqarma tóraǵasynyń mindetin atqarýshy Shyńǵys Orazálimov bul qaǵıdattyń eGov Mobile qosymshasyndaǵy eGov GPT servısi arqyly júzege asyrylyp jatqanyn atap ótti.

— Qazaqstan eGov 3.0 júıesin damytý baǵytynda aýqymdy jumys atqardy. Biz bul júıeniń damýyn muqııat baqylap otyrmyz jáne Qazaqstannyń tájirıbesin óte qyzyqty dep sanaımyz. Azamattardyń memlekettik qyzmettermen ózara is-qımylyn jeńildetý úshin jasandy ıntellektini qoldaný tásili erekshe nazar aýdartady. Biz bul tájirıbeni egjeı-tegjeıli zerdelep, ony Grýzııada qoldaný múmkindikterin qarastyrǵymyz keledi, — dedi Grýzııanyń Tsıfrlyq basqarý agenttiginiń (LEPL Digital Governance Agency) tóraǵasy Sandro Tsırekıdze.

Qazirgi ýaqytta eGov GPT arqyly 55 memlekettik qyzmet qoljetimdi. Platformany 455 myńnan astam adam paıdalanyp úlgerdi.

Tsıfrlyq servısterdi damytýdyń kelesi kezeńinde osyǵan uqsas tásil kásipkerler úshin de engiziledi. Búginde kásipkerler men bızneske qajetti memlekettik qyzmetter, tsıfrlyq servıster jáne memlekettik qoldaý sharalary bir ortaǵa jınaqtalǵan biryńǵaı tsıfrlyq keńistik — eGov Business arqyly usynylady.

eGov Business qosymshasyn aı saıyn shamamen 44 myń kásipker paıdalanady. Servıste shaǵyn jáne orta bızneske arnalǵan 40-tan astam memlekettik qyzmet pen lıtsenzııa, kompanııa týraly málimetter jáne qujattar qoljetimdi. Qosymsha arqyly paıdalanýshylar QR-kodtyń kómegimen 410 myńnan astam qujatqa qol qoıǵan. Sonymen qatar bıometrııalyq sáıkestendirý arqyly HQKO-ǵa barmaı-aq shamamen 28 myń ETsQ shyǵaryldy.

— Kásipker negizgi máselelerin bir qosymsha arqyly sheshe alatyn júıege kóshý baǵytynda jumys istep jatyrmyz. Atap aıtqanda, kompanııa qujattaryn tsıfrlyq formatta rásimdeý múmkindigin engizýdi josparlap otyrmyz. JShS jarǵysyn onlaın rejımde ázirleýge, oǵan qol qoıýǵa jáne keıin ózgerister engizýge bolady, bul rette qujattyń barlyq nusqalary saqtalatyn bolady. Sondaı-aq FinTech servısterimen birlesip, banktik kartany tikeleı qosymsha arqyly shyǵarý múmkindigin qarastyryp jatyrmyz, — dedi Shyńǵys Orazálimov.

Jasandy ıntellektini tikeleı eGov Business platformasyna engizý de mańyzdy baǵyttardyń biri bolady. eGov GPT mýltıagenttik platformasy kásipkerge qajettiligin erkin túrde sıpattaýǵa múmkindik beredi. Júıe kórsetilgen mindetke sáıkes qajetti qyzmetti anyqtap, ótinimdi daıyndaýǵa kómektesedi.

Sessııa barysynda tsıfrlyq memleketti damytýdaǵy halyqaralyq tásilder, derekter men jasandy ıntellektini paıdalaný, GovTech-ti damytý jáne tsıfrlyq sheshimderdi aýqymdy túrde engizý múmkindikteri de talqylandy.

— Meniń oıymsha, búginde Qazaqstan tehnologııalyq damý salasyndaǵy álemdik kóshbasshylardyń biri bolyp otyr. El jasandy ıntellekt tehnologııalaryn memlekettik deńgeıde belsendi engizip, olardy memlekettik organdardyń qyzmetine júıeli túrde ıntegratsııalaýda. Qazaqstannyń jas urpaqty damytýǵa erekshe kóńil bólip otyrǵanyn atap ótkim keledi. Jastarǵa jasandy ıntellekt, tsıfrlyq tehnologııalar jáne ınnovatsııalar sııaqty perspektıvaly baǵyttarda múmkindik jasaý eldiń bolashaǵy úshin asa mańyzdy. Qazaqstannyń damý perspektıvalaryna zor senimmen qaraımyn. Qazirgi álem barǵan saıyn ózara baılanysqan sıpatqa ıe bolyp keledi, al Qazaqstan jahandyq tehnologııalyq keńistikte mańyzdy oryn alyp otyr, — dep atap ótti tsıfrlyq úkimet jáne tsıfrlyq transformatsııa salasyndaǵy halyqaralyq sarapshy Rıchard Kırbı.

eGov 3.0-di damytý memlekettik qyzmetterdi izdeý jáne olardy paıdalanýshynyń óz betinshe alýyna negizdelgen dástúrli tásilden proaktıvti tsıfrlyq súıemeldeýge kóshýge baǵyttalǵan. Bul rette memlekettik servıster naqty paıdalanýshynyń qajettiligine beıimdelip, qajetti protsesterdi ózara baılanystyryp, qyzmet alýǵa jumsalatyn áreketter sanyn barynsha azaıtýǵa múmkindik beredi.

Qatysýshylar paıdalanýshy tájirıbesine de erekshe nazar aýdardy. Tsıfrlandyrýdyń kelesi kezeńinde tehnologııalar barǵan saıyn proaktıvti rejımde jumys istep, paıdalanýshynyń qajettiligin aldyn ala anyqtaýǵa, qajetti protsesterdi biriktirýge jáne qyzmetterdi barynsha az áreket arqyly alýǵa jaǵdaı jasaýy tıis.

AI & Digital Bridge 2026 alańynda ótken paneldik sessııa memlekettik, tehnologııalyq jáne halyqaralyq saraptamany bir arnaǵa toǵystyryp, tsıfrlyq memleketti jáne memlekettik qyzmetterdi odan ári damytý baǵyttaryn talqylaýǵa múmkindik berdi.

«Ulttyq aqparattyq tehnologııalar» AQ úshin eGov 3.0-di damytý Qazaqstannyń tsıfrlyq úkimetin odan ári jetildirýdiń negizgi baǵyttarynyń biri bolyp esepteledi.

Eske salaıyq, buǵan deıin QR Jasandy ıntellekt jáne tsıfrlyq damý mınıstrliginiń birinshi vıtse-mınıstri Rostıslav Konıashkın eGov GPT arqyly 50 memlekettik qyzmetti qarapaıym chat formatynda alýǵa bolatynyn aıtyp bergen edi.