Elimizde dzıýdo jattyqtyrýshylarynyń biliktiligin arttyrýǵa arnalǵan semınar bastaldy
ASTANA. KAZINFORM – Astanada álemdik dzıýdo salasynyń belgili ókili, 1980 jylǵy Máskeý Olımpıadasynyń chempıony jáne tabysty jattyqtyrýshylardyń biri Etsıo Gambanyń jetekshiligimen jattyqtyrýshylarǵa arnalǵan semınar ótip jatyr. Іs-sharany Týrızm jáne sport mınıstrligi uıymdastyrdy.
Etsıo Gamba men onyń komandasy Qazaqstan ulttyq dzıýdo quramasyn daıarlaý boıynsha yntymaqtastyq ornatqan. Bul jumys barysynda halyqaralyq deńgeıde tıimdiligi dáleldengen zamanaýı jattyǵý ádisteri engiziledi.
Eki kúnge josparlanǵan semınar baǵdarlamasyna teorııalyq jáne praktıkalyq sabaqtar kiredi. Arnaıy nazar sportshylardy daıyndaý ádisterin jetildirýge arnalǵan teorııalyq-praktıkalyq modýlderge aýdarylǵan. Baǵdarlama aıasynda tórt tehnıkany meńgerý jáne kórsetý boıynsha toptyq jumystar, sondaı-aq jattyǵý úderisin maqsatty kórsetkishter negizinde modeldeý qarastyrylǵan.
Jattyqtyrýshylar quramynda halyqaralyq deńgeıdegi tájirıbeli mamandar bar. Olardyń qatarynda Eýropanyń eki dúrkin chempıony, álem chempıonatynyń kúmis júldegeri Robert Mshvıdobadze, Frantsııa men Italııadan kelgen bapkerler Stefano Frassınelı, Marotto Felıchıano, Jıber Jan-Per jáne qazaqstandyq mamandar bar.
Bul semınardyń maqsaty – otandyq jattyqtyrýshylardyń kásibı deńgeıin kóterý, sportshylardy daıarlaý júıesin jaqsartý jáne Qazaqstan dzıýdosynyń halyqaralyq arenadaǵy pozıtsııasyn nyǵaıtý.
Іs-shara iri halyqaralyq jarystar aldynda ótkizilip jatyr. Olardyń qatarynda jazǵy Azııa oıyndary jáne Qazaqstanda dástúrli túrde ótetin Grand Slam serııasynyń kezeńi bar.
Eske salsaq, buǵan deıin Halyqaralyq dzıýdo federatsııasy Qytaıdyń Ordos qalasynda ótetin dzıýdodan Azııa chempıonatyna qatysýshylardyń aldyn ala tizimin usynǵanyn jazǵan edik.
