Elimizde dropperlerdiń shottary arqyly 112 mlrd teńgeden astam zańsyz operatsııa júrgizilgen
ASTANA. KAZINFORM – Qarjylyq monıtorıng agenttigi jyl basynan beri qylmystyq kiristerdi jylystatýmen aınalysqan 33 dropperlik toptyń qyzmetin toqtatty.
Agenttik dropperlikpen kúresti eldiń qarjylyq qaýipsizdigin qamtamasyz etýdegi basym baǵyttardyń biri retinde qarastyrady.
Jyl basynan beri qylmystyq shemalardy uıymdastyrǵan 40-tan astam adam anyqtalyp, zańsyz áreketke 500-den astam azamattyń tartylǵany belgili boldy.
– Dropperlerdiń banktik shottary arqyly jalpy somasy 112 mlrd teńgeden astam zańsyz qarjylyq operatsııalar júrgizilgen. Tek sońǵy eki aıdyń ózinde myńnan astam drop-karta buǵattaldy, – delingen habarlamada.
Máselen, QMA-nyń Batys Qazaqstan oblysy boıynsha departamenti ınternet-alaıaqtyqtan túsken qarajatty zańdastyrý úshin azamattardyń banktik shottaryn paıdalanǵan halyqaralyq «dropovodtar» jelisiniń qyzmetin toqtatty.
Tergeý málimetinshe, buǵattalǵan shottar arqyly shamamen 17 mln teńge ótkizilgen. Keıin uıymdasqan top músheleri shot ıesi bolǵan 18 jastaǵy azamatty kúshtep ustap, kúsh qoldanamyz dep qorqytyp, banktik shottarǵa qoljetimdilikti qalpyna keltirýge májbúrlegen.
Osyǵan uqsas shema Jetisý oblysynda da anyqtaldy.
Áleýmettik jelidegi jumys týraly habarlandyrýǵa sengen jergilikti turǵyn kýratorlardyń nusqaýymen ınternet-alaıaqtyqtan túsken qarajatty óziniń banktik shottary arqyly qabyldap otyrǵan. Keıin aqshany krıptovalıýtaǵa aıyrbastap, uıymdastyrýshylardyń shottaryna aýdaryp, ár operatsııadan komıssııa alǵan.
– Túrkistan oblysynda dropperlik shema Telegram messendjerindegi jasyryn kýrator arqyly basqarylǵan. Ol stýdentter men kámeletke tolmaǵandardy syıaqy usynyp, ınternet-bankıngke qoljetimdilikti berýge kóndirgen. Sonyń saldarynan 20-dan astam jas tergeýge tartyldy, – dep atap ótti agenttikten.
Qarjylyq monıtorıng agenttigi dropperlik shemalarǵa qatysý qylmystyq jaýapkershilikke ákep soǵatynyn eskertti.
Eldiń qarjylyq qaýipsizdigi ár azamattyń jeke jaýapkershiliginen bastalady.
Aıta keteıik, elde 200-den astam dropper sottaldy.
