Elimizde dinı mamandar qaıda daıarlanady
ASTANA. KAZINFORM — Elimizde 5,6 myńnan astam stýdent dinı bilim alyp jatyr. Bul týraly Mádenıet jáne aqparat mınıstrliginiń Din isteri komıtetinen málim etti.
— Qazaqstanda din salasynyń mamandaryn daıarlaıtyn 15 teologııalyq bilim berý uıymy jumys isteıdi. Bul oqý oryndarynda 5,6 myńnan astam stýdent bilim alyp jatyr, — delingen komıtettiń agenttik saýalyna bergen jaýabynda.
Din salasyndaǵy ýákiletti organ Qazaqstan aýmaǵynda qurylǵan dinı birlestikterdiń, mıssıonerlerdiń jáne dinı bilim berý uıymdarynyń qyzmetin óz quzyreti sheginde zerdelep, taldaý júrgizedi. Qoldanystaǵy zańnamaǵa sáıkes respýblıkalyq jáne óńirlik dinı birlestikter óz jarǵylaryna saı dinı qyzmetshilerdi daıarlaýdyń kásiptik oqý baǵdarlamalaryn iske asyratyn dinı bilim berý uıymdaryn qurýǵa quqyly.
— Qazirgi tańda Qazaqstanda din salasyndaǵy mamandardy daıarlaýǵa baǵyttalǵan 15 teologııalyq oqý orny bar. Onyń 13-i ıslamdyq baǵytta, ekeýi hrıstıandyq baǵytta bilim beredi, — dep atap ótedi vedomstvodan.
Komıtet málimetinshe ıslamdyq baǵyttaǵy oqý oryndarynyń qatarynda «Nur-Múbarak» Mysyr ıslam mádenıeti ýnıversıteti, 9 medrese-kolledj, Hýsamýddın as-Syǵanaqı atyndaǵy Islam ınstıtýty, Qazaqstan musylmandary dinı basqarmasy janyndaǵy Imamdardyń biliktiligin arttyrý respýblıkalyq ıslam ınstıtýty jáne Qoja Ahmet ıAsaýı atyndaǵy Imamdardyń biliktiligin arttyrý respýblıkalyq ıslam ınstıtýty bar.
Al hrıstıandyq baǵyttaǵy dinı bilim berý júıesinde Almaty pravoslavıe dinı semınarııasy jáne Qaraǵandydaǵy «Márııam — Shirkeý Anasy» Eparhııaaralyq joǵary rýhanı semınarııasy jumys isteıdi. Atalǵan bilim berý uıymdarynda teologııalyq jáne dinı kadrlardy daıarlaý júzege asyrylady.
Ýákiletti organnyń málimetinshe, qazirgi ýaqytta Qazaqstan aýmaǵynda ózge dinı bilim berý uıymyn ashýǵa qatysty tirkelgen ótinimder joq.
Buǵan deıin dinı qyzmet salasyndaǵy zańnamany buzǵany úshin bıyl qansha azamat jaýapqa tartylǵanyn jazǵan edik.
