Elimizde dıpfeıkter úshin qylmystyq jaýapkershilik engizilýi múmkin
ASTANA. KAZINFORM — Jasandy ıntellekt týraly jańa zań jobasy aıasynda dıpfeıkterdi qurý áreketteri úshin qylmystyq jaýapkershilik jazasy engizý múmkindigi talqylanady. Bul týraly Májilis depýtaty Ekaterına Smyshlıaeva málim etti.
— Shynynda da, dıpfeıkter — jasandy ıntellekt tehnologııasynyń kóleńkeli jaǵy jáne ol búginde qarqyn alyp keledi. Bizdiń áreptesterge (depýtattar) qatysty kóptegen dıpfeık jasaldy. Alǵash ret dıpfeıkter saılaý kezeńderinde manıpýlıatsııa úshin paıdalanyldy, olar dál osy maqsat úshin jasalǵan. Biraq keıinirek alaıaqtar muny belsendi túrde paıdalana bastady. Álemde ártúrli tásilder qoldanylady, olardy eki nusqaǵa bólýge bolady. Birinshisi — dıpfeıkterdi paıdalanǵany úshin qatań qylmystyq jazalar bolsa, ekinshisi — kontent jasaýshyǵa onyń dıpfeık jarııalaǵanyn anyq kórsetý úshin tańbalaý talaby engizilgen, — dedi Ekaterına Smyshlıaeva Parlament Májilisinde zań jobasyn tanystyrý kezinde.
Atap aıtqanda, búgin Parlament Májilisinde tanystyrylǵan «Jasandy ıntellekt týraly» zań jobasynda manıpýlıatsııalaı alatyn JI qurýǵa tyıym salý normasy eskerilgen.
Bul turǵyda Ekaterına Smyshlıaeva bul zań jobasynda adamdardy áleýmettik, bıometrııalyq jáne minez-qulyq erekshelikterine qaraı baǵalaý úshin JI qoldanýǵa qatań shekteý engiziletinin, sondaı-aq adam minez-qulqyn manıpýlıatsııalaı alatyn JI qurýǵa jáne paıdalanýǵa tyıym salynatynyn aıtty. Osy rette dıpfeıkpen kúres is-sharalary qamtylyp otyr. Zań jobasynyń normalarynda qylmystyq jaýapkershilik qarastyrylmaǵan, biraq ony engizý máselesi qujatty aldaǵy talqylaýlarda qarastyrylýy múmkin.
Buǵan deıin depýtat jasandy ıntellekt aıasynda eńbek naryǵyna jańa kásipter engizilýi múmkin ekenin aıtty.