Elimizde densaýlyq saqtaý júıesin jetildirýge arnalǵan keshendi sharalar qabyldanady
ASTANA. KAZINFORM – Premer-mınıstrdiń orynbasary – jasandy ıntellekt jáne tsıfrlyq damý mınıstri Jaslan Mádıev densaýlyq saqtaý júıesin tsıfrlyq transformatsııalaý máselelerine arnalǵan jumys keńesin ótkizdi. Bul týraly Úkimettiń baspasóz qyzmeti habarlady.
Kezdesý barysynda medıtsınalyq kómektiń sapasyna tikeleı áser etetin naqty basymdyqtar talqylandy. Atap aıtqanda, medıtsınalyq kómektiń qoljetimdiligin arttyrý, dárigerler men medıtsına qyzmetkerlerine túsetin ákimshilik júktemeni azaıtý, protsesterdiń ashyqtyǵyn qamtamasyz etý jáne derektermen jumys isteý arqyly salany tıimdi basqarý máseleleri qaraldy.
Medıtsınalyq qyzmet sapasy men kólemin jasandy ıntellekt tehnologııalaryn qoldaný arqyly baqylaý júıesin qurý mindetin buǵan deıin Memleket basshysy óz Joldaýynda belgilegen bolatyn.
Tsıfrlyq transformatsııa aıasynda qoldanystaǵy aqparattyq júıelerdi shoǵyrlandyrý, sondaı-aq Biryńǵaı memlekettik medıtsınalyq aqparattyq júıeni (BMMAJ) jáne medıtsınalyq derekterdiń biryńǵaı qoımasy – Smart Data Healthcare júıesin damytý josparlanýda. Atalǵan platforma densaýlyq saqtaý salasyndaǵy qoldanystaǵy aqparattyq júıelerdegi (sonyń ishinde jeke medıtsınalyq aqparattyq júıelerdegi) málimetterdi biriktirip, derekterge negizdelgen keshendi taldaý, boljaý jáne basqarýshylyq sheshimder qabyldaýǵa múmkindik beredi.
Azamattar úshin bul medıtsınalyq qyzmetterdi túsinikti ete túsedi: olarda ózderiniń elektrondyq densaýlyq pasportyna qol jetkizý, taǵaıyndaýlardy, kórsetilgen qyzmetterdi jáne emdeý tarıhyn «derekterdi patsıenttiń ózi baqylaıdy» qaǵıdaty boıynsha tsıfrlyq formatta qadaǵalaý múmkindigi paıda bolady.
Servısterdi yńǵaıly etý maqsatynda barlyq sheshimder QazTech platformasynda ornalastyrylyp, eGov júıesimen biriktiriledi. Bul azamattarǵa artyq anyqtamasyz nemese kezeksiz, medıtsınalyq qyzmetke jyldam ári ońaı qol jetkizýge múmkindik beredi.
Densaýlyq saqtaý júıesi úshin negizgi mindetterdiń biri – derekterdi qorǵaý jáne burmalaýdyń aldyn alý. Medıtsınalyq uıymdarda patsıentterdiń naqty kelýin tirkeıtin faceID tetikteri engizilgen. Endi ony eki tásilmen: eGov Mobile qosymshasy arqyly nemese bıometrııalyq sáıkestendirý kómegimen rastaýǵa bolady.
Sonymen qatar ótken jyldan bastap «Áleýmettik ámııan» jobasy júzege asyrylýda. Onyń aıasynda azamattar ambýlatorııalyq dári-dármekpen qamtamasyz etý sheńberindegi kepildendirilgen dárilik zattar paketin ala alady. Qyzmet 700-den astam memlekettik dárihanany qamtıdy (17 mln retseptiniń 13,9 mln-y «Áleýmettik ámııan» jobasynyń tsıfrlyq tetigi arqyly rásimdelgen). Bıyl bul tájirıbeni qosymsha tólem tetigin paıdalana otyryp, jekemenshik dárihanalarda da keńinen qoldaný josparlanyp otyr. Budan bólek, medıtsınalyq qyzmetterge vaýcher alý múmkindigin engizý kózdelýde. Bul azamattar úshin medıtsınalyq kómek alý protsesin odan ári ashyq ári yńǵaıly etedi.
Tsıfrlyq sheshimder kezeń-kezeńmen engiziledi. Negizgi maqsat – azamattarǵa naqty nátıje usyný jáne dárigerler men jalpy densaýlyq saqtaý júıesine túsetin júktemeni azaıtý.
Eske salsaq, budan buryn sheteldik jumys kúshi tek kadr tapshylyǵy bar salaǵa tartylatynyn jazǵanbyz.
