Elimizde dekrettik demalys tártibin ózgertý usynyldy
ASTANA. KAZINFORM - Qazaqstanda er adamdarǵa bala kútimine baılanysty demalys berý tártibin jáne bala kútimi kezeńinde áıelderge kórsetiletin qoldaýdy ózgertý máselesi qarastyrylyp jatyr.
Úkimet er adamdarǵa memleket tarapynan bala kútimine baılanysty demalys berý qanshalyqty oryndy ekenin talqylady. Sondaı-aq bala týǵannan keıingi alǵashqy eki jylda áıelderge kórsetiletin qoldaýdyń bir bóligin bóbekjaı-baqsha oryndarymen jáne bala kútýshi qyzmetimen almastyrý múmkindigi sóz boldy.
Bul týraly Prezıdent Qasym-Jomart Toqaevtyń tapsyrmalaryn iske asyrý máseleleri jónindegi Úkimet otyrysynda aıtyldy.
– Memleket tarapynan er azamattarǵa bala kútimine baılanysty demalys berý qanshalyqty oryndy ekeni qaraldy. Sondaı-aq áıelderge bala kútiminiń eki jyldyq kezeńinde kórsetiletin qoldaý formatyn ózgertý máselesi talqylandy. Atap aıtqanda, balalardy bóbekjaı-baqshamen qamtý jáne kishkentaı balalarǵa kútim jasaıtyn bala kútýshiler tapshylyǵyn sheshý múmkindikteri qarastyryldy, - delingen Úkimet habarlamasynda.
Ázirge bul usynystar boıynsha túpkilikti sheshim qabyldanǵan joq.
Dekrettik demalysqa qatysty másele áleýmettik kómek júıesin reformalaý aıasynda qarastyrylyp jatyr. Alǵashqy kezeńde Úkimet 36 tólem túriniń 14-in ataýly qaǵıdatqa kóshirýdi josparlap otyr, ıaǵnı kómek azamattardyń naqty muqtajdyǵy eskerile otyryp kórsetiledi.
Sondaı-aq qazir jergilikti atqarýshy organdar kórsetetin áleýmettik kómektiń 13 túrin tórt túrge biriktirý usynyldy.
Sonymen qosa 2027 jyldyń basynan bastap ardagerlerge kórsetiletin jekelegen qoldaý sharalaryna da ataýlylyq qaǵıdatyn engizý kózdelip otyr.
Jıynda Eńbek jáne halyqty áleýmettik qorǵaý mınıstri Asqarbek Ertaev múgedektigi bar azamattardyń derekterin tekserý kezinde jasandy ıntellektini qoldaný nátıjeleri týraly da aıtty.
– Júıe múgedektik belgileýge negiz bolǵan medıtsınalyq qujattardy qoldan jasaýdyń 167 jaǵdaıyn anyqtady. Materıaldar quqyq qorǵaý organdaryna berildi. Budan bólek, ártúrli adamdardyń derekteri birdeı bolyp shyqqan 18 647 jaǵdaı anyqtaldy, - delingen habarlamada.
Sonymen qatar 1 qazannan bastap qazaqstandyqtarǵa áleýmettik tólemderdi berý sharttaryndaǵy ózgerister týraly SMS, eGov Mobile jáne bankterdiń mobıldi qosymshalary arqyly kezeń-kezeńimen habarlana bastaıdy.
Aıta keteıik, buǵan deıin qazaqstandyq analar bala kútimine qansha qarajat jumsaıtyny jóninde materıal jarııaladyq.
