Elimizde dástúrli medıtsınanyń standarty bekitildi
ASTANA. KAZINFORM – Dástúrli medıtsına salasynda medıtsınalyq kómek kórsetý standartyn bekitý týraly buıryq shyqty. Qujatqa QR Densaýlyq saqtaý mınıstriniń mindetin atqarýshy qol qoıdy.
Qujatqa sáıkes, dástúrli medıtsına qyzmetterin ambýlatorııalyq-emhanalyq, statsıonarlyq jáne statsıonardy almastyratyn uıymdarda kórsetýge bolady. Sondaı-aq, menshik túri men qandaı vedomstvoǵa baǵynatynyna qaramastan, shıpajaı mekemeleri de joǵarydaǵy tizimge kiredi.
Qyzmetterdi kimder kórsete alady
Dástúrli medıtsına salasynda medıtsınalyq kómekti joǵary medıtsınalyq bilimi nemese kelesi baǵyttar boıynsha arnaıy daıarlyǵy bar mamandar kórsetýge quqyly:
• refleksoterapııa;
• manýaldyq terapııa;
• sý-djok terapııasy;
• gomeopatııa;
• gırýdoterapııa;
• fıtoterapııa.
Medıtsına qyzmetkerleri Densaýlyq saqtaý mınıstrliginiń qoldanystaǵy talaptaryna sáıkes mindetti jáne merzimdik medıtsınalyq tekserýlerden ótýi tıis.
Jumysty uıymdastyrý
Medıtsınalyq qyzmetke lıtsenzııasy bar densaýlyq saqtaý sýbektileri dástúrli medıtsınanyń baǵytyna qaraı mamandandyrylǵan kabınetter uıymdastyrýy qajet.
Olarǵa refleksoterapııa, manýaldyq terapııa, gırýdoterapııa, gomeopatııa, fıtoterapııa jáne tabıǵı quraldar kabınetteri jatady.
Negizgi mindetter
Qujatta dástúrli medıtsına qyzmetterin kórsetetin uıymdardyń negizgi mindetteri aıqyndalǵan. Olardyń qatarynda tómendegi pýnktiler bar:
• medıtsınalyq kómektiń qaýipsizdigi men sapasyn qamtamasyz etý;
• dástúrli medıtsına ádisterin bekitilgen hattamalarǵa sáıkes qoldaný;
• aýrýlardyń aldyn alý jáne patsıentterdi ońaltý;
• patsıentterdi emdeý ádisteri men qarsy kórsetilimder týraly habardar etý;
• sanıtarııalyq-epıdemıologııalyq talaptardy saqtaý;
• mamandardyń biliktiligin arttyrý.
Qyzmet túrleriniń tizbesi
Ambýlatorııalyq jáne statsıonarlyq jaǵdaılarda kelesi kómek túrlerin kórsetýge ruqsat etiledi:
• refleksoterapııa;
• manýaldyq terapııa;
• gırýdoterapııa;
• gomeopatııa;
• fıtoterapııa jáne tabıǵı quraldardy qoldaný ádisteri.
Shıpajaı uıymdary da osyndaı qyzmetter kórsete alady.
Buıryq 2026 jyldyń 5 maýsymynan bastap kúshine enedi.
Aıta keteıik, buǵan deıin 2022 jyldan bastap oqýǵa túsken medıtsına mamandary jańa júıe boıynsha jumys isteıtinin jazǵanbyz.
