Elimizde daryndy balalardy qoldaýǵa arnalǵan jańa jobalar júzege asyrylmaq
ASTANA. KAZINFORM — 2025 jyly Qazaqstanda daryndy balalardy qoldaýǵa arnalǵan birneshe bastama kóterilip, júzege asyp jatyr. Bul jóninde Ortalyq kommýnıkatsııalar alańyndaǵy brıfıngte Oqý-aǵartý mınıstrliginiń ókilderi baıandady. Bul týraly Oqý-aǵartý mınıstrligi málim etti.
— Oqý-aǵartý mınıstrligine qarasty «Daryn» respýblıkalyq ǵylymı-praktıkalyq ortalyǵy daryndy oqýshylar men pedagogterdi qoldaýǵa baǵyttalǵan SMART Daryn ulttyq tsıfrlyq platformasyn iske qosty. Jańa joba — oqýshylardyń shyǵarmashylyq jáne zııatkerlik áleýetin damytýǵa, pedagogterdiń kásibı biliktiligin arttyrýǵa, sondaı-aq bilim berý protsesine zamanaýı tsıfrlyq tehnologııalardy engizýge arnalǵan mańyzdy qadam. Endi atalǵan platorma arqyly oqýshylar ıntellektýaldy saıystarǵa tirkelip, onyń irikteý kezeńinen óte alady, — delingen habarlamada.
Sondaı-aq, Qazaqstan Respýblıkasy Prezıdentiniń 2025-2029 jyldarǵa arnalǵan bilim berý júıesine jasandy ıntellektini engizý jónindegi Joldaýyn iske asyrý aıasynda jańa bastama — AEROO Space AI Competition ınjenerlik jarysy bastaý alady. Bul jarys ınjenerlik jáne baǵdarlamalyq sheshimderdi jasandy ıntellekt tehnologııalarymen biriktirýge baǵyttalǵan. Qatysýshylar zamanaýı ınjenerlik tásilder men tsıfrlyq tehnologııalardy qoldana otyryp, ózderiniń nanospýtnıkterin ázirlep, ushyrý múmkindigine ıe bolady.
Eske sala keteıik, 2022 jyldan beri halyqaralyq ıntellektýaldyq saıystardyń jeńimpazdary men olardyń jetekshileri bir rettik aqshalaı syıaqy alady. Ári bilim dodalarynda kók týymyzdy jelbiretip júrgen jetkinshekterge «Bolashaq» baǵdarlamasy arqyly sheteldik úzdik JOO-larda bilim alý múmkindigi berildi. Daryndy balalardy qoldap, olardyń qabiletterin damytý úshin memleket tarapynan jasalyp jatqan mundaı qadamdar ıntellektýaldy urpaq tárbıelep, balalardyń básekege qabilettiligin arttyrýǵa jaǵdaı jasaıdy.
Al oqýshylarǵa qandaı medıtsınalyq kómek tegin kórsetiletinin myna siltemeden oqı alasyz.