Elimizde dárigerlerge arnalǵan ana sútimen qorektendirý jónindegi oqý quraly jańartyldy
ASTANA. KAZINFORM — Qazaqstanda ana sútimen qorektendirýdi qoldaýǵa arnalǵan jańa nusqaýlyq ázirlendi, dep habarlaıdy Densaýlyq saqtaý mınıstrliginiń baspasóz qyzmeti.
Densaýlyq saqtaý mınıstrligi, Dúnıejúzilik densaýlyq saqtaý uıymy (DDU) jáne Eýrazııalyq turaqtandyrý jáne damý qory (ETDQ) birlesip júzege asyryp jatqan «Balaǵa izgi nıetpen qaraıtyn aýrýhanada ana sútimen qorektendirýdi qorǵaý, qoldaý jáne yntalandyrý» jobasy sheńberinde medıtsına qyzmetkerlerine arnalǵan «Balaǵa izgi nıetpen qaraıtyn aýrýhanada ana sútimen qorektendirýdi qorǵaý, qoldaý jáne yntalandyrý. Aýrýhanalarda ana sútimen qorektendirýge qolaıly jaǵdaılar jasaý jónindegi DDU/ıÝNISEF qaıta qaralǵan bastamasy» oqý-ádistemelik quraly jańartyldy. Qujat QR Densaýlyq saqtaý mınıstrliginiń resmı saıtynda jarııalandy.
— Biz ana sútimen qorektendirýdi qoldaýdyń jeke bastama emes, ana men balanyń densaýlyǵyn saqtaý júıesiniń ajyramas bóligine aınalýyna umtylamyz. Árbir áıel turǵylyqty óńirine qaramastan, medıtsınalyq uıymda biryńǵaı zamanaýı standarttarǵa negizdelgen bilikti kómek alýǵa múmkindikke ıe bolýy tıis. Jańartylǵan oqý-ádistemelik qural jáne ulttyq trenerlerdi daıarlaý — mundaı tásilderdi elimizdiń barlyq óńirinde júıeli túrde engizýge jasalǵan mańyzdy qadam, — dep atap ótti Densaýlyq saqtaý mınıstri Aqmaral Álnazarova.
Oqý-ádistemelik qural bosandyrý jáne medıtsınalyq-sanıtarııalyq alǵashqy kómek uıymdarynyń basshylaryna, akýsher-gınekolog dárigerlerge, neonatologter men pedıatrlarǵa, sondaı-aq ana sútimen qorektendirýdi qorǵaý, qoldaý jáne yntalandyrý baǵdarlamalary boıynsha ulttyq jáne óńirlik sarapshylar men úılestirýshilerge arnalǵan.
— Búkil álemde balalardyń jartysynan azy ómiriniń alǵashqy alty aıynda tek qana ana sútimen qorektenedi, Qazaqstan da budan tys emes. Bul — syn-qater, sonymen qatar birlesken jumys júrgizýge múmkindik. Ana sútimen qorektendirýge qolaıly jaǵdaı jasaý — densaýlyq saqtaý júıesiniń ortaq jaýapkershiligi. DDU Qazaqstanǵa ana sútimen qorektendirýdi ilgeriletý jáne balaǵa izgi nıetpen qaraıtyn aýrýhanalar jelisin qalpyna keltirý baǵytynda budan ári de qoldaý kórsetýge daıyn, — dedi DDU-nyń Qazaqstandaǵy ókili, doktor Skender Syla.
Oqý-ádistemelik quraldy Qazaqstandaǵy neonatologııa salasynyń jetekshi mamandarynyń biri, medıtsına ǵylymdarynyń doktory, professor Tamara Kýrmangalıevna Chývakova QR Densaýlyq saqtaý mınıstrligi men DDU-nyń Qazaqstandaǵy eldik ofısiniń tehnıkalyq qoldaýymen ázirledi.
Ana sútimen qorektendirý — bala úshin mańyzdy qorek kózi ǵana emes, sonymen qatar onyń densaýlyǵyn saqtaýdyń negizgi sharalarynyń biri. Ol ınfektsııalar qaýpin tómendetýge, ońtaıly ósýi men damýyn qamtamasyz etýge jáne uzaq merzimdi perspektıvada densaýlyǵyn nyǵaıtýǵa yqpal etedi.
Ana sútimen qorektendirý tájirıbesiniń jetkiliksiz bolýy balalar men analardyń densaýlyǵyna ǵana emes, elderdiń ekonomıkalyq ál-aýqatyna da áser etedi. DDU-nyń baǵalaýynsha, jahandyq aýqymda ana sútimen ońtaıly qorektendirmeýge baılanysty jyl saıynǵy ekonomıkalyq shyǵyn 257-den 341 mlrd AQSh dollaryna deıin baǵalanady.
Osy turǵyda medıtsınalyq uıymdarda ana sútimen qorektendirýge qolaıly jaǵdaılar jasaý, sondaı-aq áıeldermen jáne otbasylarmen tikeleı jumys isteıtin medıtsına qyzmetkerleriniń quzyretterin arttyrý erekshe mańyzǵa ıe.
Oqý-ádistemelik quraldy ázirleý jáne jetildirý barysynda materıaldardy talqylaýǵa jáne jetildirýge qatysqan densaýlyq saqtaý júıesiniń sarapshylary men mamandarynyń da úlesi eskerildi.
Osyǵan deıin dıetolog emizýli analarǵa shaı ishýge bolmaıtynyn aıtqan edi.
