Elimizde dári-dármek óndirisi artyp, jańa 494 preparat shyǵarylmaq
ASTANA. KAZINFORM — Qazaqstanda farmatsevtıkalyq ónim óndirý kólemi keıingi úsh jylda 37% artyp, 191 mlrd teńgege jetti. Bul týraly Densaýlyq saqtaý mınıstrliginiń baspasóz qyzmeti habarlady.
Vedomstvonyń málimetinshe, ósim bıyl da jalǵasyp otyr. 2026 jyldyń alǵashqy alty aıynda elimizde 126,6 mlrd teńgege dárilik zattar men medıtsınalyq buıymdar óndirilgen. Bul 2025 jyldyń osy kezeńindegi kórsetkishten shamamen 30% joǵary.
Qazir Qazaqstanda farmatsevtıkalyq jáne medıtsınalyq ónim shyǵaratyn 209 kásiporyn jumys isteıdi. Onyń 43-i dárilik zattar óndiredi. Otandyq ónimniń zattaı kórsetkishtegi úlesi 40,3%-ǵa jetken.
Saladaǵy óndiristi odan ári ulǵaıtý úshin segiz iri joba júzege asyrylyp jatyr. Olar Qazaqstanda buryn óndirilmegen 494-ten astam ataýdaǵy dárilik zatty shyǵarýdy jolǵa qoıýǵa múmkindik beredi.
Jańa óndiristerdiń qatarynda onkologııalyq, júrek-qantamyr, aýtoımmýndyq, orfandyq jáne ınfektsııalyq aýrýlardy, sondaı-aq qant dıabetin emdeýge arnalǵan preparattar bar.
Eske salaıyq, buǵan deıin Qazaqstanda dárilik zattar men medıtsınalyq buıymdardyń sapasyn baqylaý tártibin ózgertý usynylǵanyn habarlaǵan edik.
