Elimizde dári-dármek baǵasyna qatysty qansha shaǵym tústi
Qazaqstanda dárilik zattardyń 6,8 myń saýda ataýyna shekti baǵa bekitildi, dep habarlaıdy Kazinform.
«Kóterme jáne bólshek saýda jelisindegi baǵalardy memlekettik retteý «Halyq densaýlyǵy jáne densaýlyq saqtaý júıesi týraly» Kodekstiń 245-babynyń 1-tarmaǵyna sáıkes tizbege engizilgen dárilik zattarǵa qatysty júzege asady. Qunyn retteýge jatatyn dárilik zattardyń shekti baǵalary men tizbesi preparattardyń shekti baǵalaryn jáne ústeme baǵalaryn qadaǵalaý, qalyptastyrý qaǵıdalaryna sáıkes jylyna eki ret bekitiledi. Ýákiletti organ dárilik zattyń saýda ataýyna shekti baǵalardy bekitedi, alaıda básekeles ortaǵa baılanysty onyń quny shekti baǵadan tómen satylýy múmkin. Qazir Densaýlyq saqtaý mınıstriniń 2023 jylǵy 7 tamyzdaǵy № 465 buıryǵymen dárilik zattardyń 6890 saýda ataýyna shekti baǵa bekitildi», - delingen mınıstrliktiń Kazinform agenttigine bergen jaýabynda.
Ákimshilik quqyq buzý kodeksiniń 426-babyna sáıkes, preparatty bekitilgen shekti baǵadan joǵary satqany úshin jaýapkershilik qarastyrylǵan.
«Dárilik zattar men medıtsınalyq zattardyń baǵasyn baqylaý aıasynda 2022-2023 jyldary 1,9 mln teńgeden astam somaǵa aıyppul salyndy. Bul turǵyda dárilik zattar men medıtsınalyq buıymdarǵa shekti baǵanyń asyp túsýiniń 15 faktisi anyqtaldy. 2022 jyly 7 fakti boıynsha 1 mln teńgege, al 2023 jyldyń 9 aıynda 8 fakti anyqtalyp, 0,9 mln teńgege aıyppul salyndy. Qazirgi kezde dári-dármek baǵasyna qatysty shaǵymdar bolǵan joq», - dep atalyp ótken vedomstvo habarlamasynda.
Budan buryn habarlanǵandaı, Qazaqstan dárihanalaryndaǵy birqatar preparatqa baqylaý kúsheıtilmek.
