Elimizde dándi daqyldardyń 61,6%-y jınaldy, 13,5 mln tonna astyq bastyryldy
ASTANA. KAZINFORM - Qazaqstanda egin jınaý naýqany jalǵasýda. Dıqandar aǵymdaǵy maýsymdaǵy egin jınaý jáne ishki naryqty astyqpen qamtamasyz etý jumystaryn jalǵastyrýda. Azyq-túlik qaýipsizdigi máselesi Prezıdent Qasym-Jomart Toqaevtyń Qazaqstan halqyna Joldaýynda aıqyndaǵan basymdyqtardyń qataryna jatady., dep habarlaıdy Úkimettiń baspasóz qyzmeti.
Aýyl sharýashylyǵy mınıstrliginiń málimetinshe, 9 qyrkúıektegi jaǵdaı boıynsha elimizde egin jınaý naýqany jalǵasýda. Sharýalar 9,6 mln gektar alqaptan dándi daqyldar jınaǵan, bul jalpy kólemniń 61,6%-yn quraıdy. Búginde ortasha ónimdiligi gektarynan 14,1 tsentner bolatyn 13,5 mln tonna astyq bastyryldy.
Bıylǵy egin jınaý jumystarynyń qarqyny 2025 jyldyń uqsas kezeńiniń kórsetkishterinen edáýir ozyq tur. Orylǵan astyqtyń sapasy da birdeı.
Lıtsenzııalanǵan astyq qabyldaý kásiporyndaryna 2,83 mln tonna astyq kelip túsken. Salystyrý úshin aıtsaq, ótken jyldyń uqsas kezeńinde qabyldaý kólemi 552,7 myń tonnany qurady. Osylaısha, túsken astyq kólemi bes eseden astam ósip otyr.
Eginniń sapasyna erekshe nazar aýdarylady. Zerthanalyq zertteýlerdiń nátıjeleri boıynsha alynǵan jumsaq bıdaıdyń 93%-y azyq-túlik klasyna jatady.
Azyq-túlikke arnalǵan bıdaı qurylymynda 75%-yn úshinshi synypty bıdaı, 18%-yn tórtinshi synypty bıdaı quraıdy. Besinshi synypty bıdaı men synypqa jatpaıtyn astyqtyń úlesi – 7%.
Zerttelgen jumsaq bıdaıdyń 51%-ynda kleıkovına mólsheri 28%-dan joǵary ekeni anyqtaldy. Taǵy 23,6%-ynda bul kórsetkish 25-27% deńgeıinde, al 25,4%-ynda – 23-24% boldy.
Bul kórsetkishter jańa eginniń azyq-túliktik áleýetiniń joǵary ekenin kórsetip, ishki naryqty sapaly astyqpen qamtamasyz etýge, sondaı-aq otandyq agroónerkásiptik keshenniń eksporttyq áleýetin odan ári damytýǵa qajetti jaǵdaı jasaıdy.
Aýyl sharýashylyǵy mınıstrligi óńirlerdiń ákimdikterimen birlesip, astyq jınaý, qabyldaý jáne saqtaý qarqynyn, onyń synyptylyǵyn, sondaı-aq sharýashylyqtardyń qajetti resýrstarmen qamtamasyz etilýin turaqty baqylaýda ustaıdy.
Aýyl sharýashylyǵynyń ózge daqyldarynan 6,3 mln tonnadan astam ónim jınaldy
Sonymen qatar negizgi aýyl sharýashylyǵy daqyldaryn jınaý jumystary jalǵasýda.
Búgingi tańda 906,5 myń tonna maıly daqyldar tuqymy, 2,4 mln tonna kókónis, 1,8 mln tonna baqsha daqyldary jáne 1,2 mln tonna kartop jınaldy.
Óńirlik shtabtar egin jınaý naýqanyn ýaqtyly aıaqtaý úshin qajetti jaǵdaıdy qamtamasyz ete otyryp, dala jumystaryn úılestirýde.
Egin jınaý jáne kúzgi egis jumystaryn júrgizý úshin óńirlerge 401,1 myń tonna dızel otyny bólindi.
Aýyl sharýashylyǵy taýaryn óndirýshilerdi mıneraldy tyńaıtqyshtarmen qamtamasyz etý jumystary jalǵasýda. Jyldyq qajettilik 2,3 mln tonnany quraıtyn bolsa, qazirdiń ózinde tıisti kelisimsharttar jasalyp, 2 mln tonna nemese jyldyq kólemniń 85%-y jóneltildi.
Bul negizgi eki mindetti qatar sheshýge: qazirgi egin jınaý naýqanyn irkilissiz aıaqtaýǵa jáne dıqandardy kelesi óndiristik tsıklge ýaqtyly daıyndaýǵa múmkindik beredi.
Qazirgi kezeńde egin jınaý jumystaryn ýaqtyly aıaqtaý, jınalǵan ónimniń saqtalýyn qamtamasyz etý, astyqty sapaly qabyldaý jáne azyq-túlik astyǵynyń jetkilikti qoryn qalyptastyrý basym mindetter bolyp qala beredi.
Jańa ónimnen kútiletin kólem elimizdiń azyq-túlik áleýetiniń joǵary ekenin kórsetedi jáne ishki naryqty sapaly astyqpen qamtamasyz etýge, sondaı-aq otandyq agroónerkásip kesheniniń eksporttyq áleýetin odan ári damytýǵa jaǵdaı jasaıdy.
Elimizdiń azyq-túlik qaýipsizdigin qamtamasyz etý jáne AÓK-ti ornyqty damytý jumystary jalǵasýda.
Osyǵan deıin biz Qazaqstannyń qaı óńirinde bıyl bıdaı ónimi joǵary bolatyny týraly jazdyq.
