Elimizde birneshe óńir sýsyz, jylýsyz qaldy

Keıingi kúnderi elimizde qatty aıaz bolyp, keıbir oblystardaǵy jylý ortalyqtary sýyqqa tótep bere almaı jatyr, dep habarlaıdy Kazinform.

Atyraý qalasynyń keıbir bóligi kesheden beri sýsyz otyr. Buǵan Jaıyq ózeninde muz qatyp, sý sorý qondyrǵylarynyń jumysy toqtaǵany sebep boldy. 

Atyraý oblysy ákiminiń baspasóz qyzmeti qalyptasqan jaǵdaıǵa baılanysty arnaıy komıssııa qurylǵanyn málim etti. Komıssııaǵa oblys ákiminiń orynbasary Qaırat Nurtaev jetekshilik etedi. Al «Atyraý oblysy Sý Arnasy» KMK-nyń baspasóz qyzmetinen málim etkendeı, keshe Jaıyq ózeninde muz qatyp, Atyraýdaǵy sý sorý qondyrǵylary toqtap qaldy. 9 jeltoqsanynda jergilikti ýaqytpen saǵat 23:30 shamasynda sý berý toqtatylǵan.

Buǵan deıin Jaıyq ózeninde muz qatyp, Atyraýdaǵy sý sorý qondyrǵylary toqtap qalǵany týraly habarlaǵan edik. 

Atyraý qalasynyń turǵyndary kesheden beri beri sý qysymynyń tómendep, keıin toqtap qalǵanyn jazyp jatyr. Turǵyndar bul týraly áleýmettik jeli men WhatsApp messendjerinde taratty. Odan bólek, Aqtaý qalasynyń turǵyndary jylýsyz qaldy. Magıstraldy qubyrdyń jarylýynan birneshe shaǵynaýdan jylýdan ajyratyldy.

«Birneshe shaǵynaýdanda jylý berýge ýaqytsha shekteýler engizildi. Sabyr saqtap, kútýlerińizdi suraımyn... Joǵary shaǵyn aýdandardy jylýmen qamtıtyn magıstraldyq 800 mm-lik qubyrda aqaý shyqty. Kommýnaldyq qyzmetter osynda, jóndeý jumystaryn júrgizip jatyr. Jaǵdaı meniń baqylaýymda bolady», - dep túsindirdi qala basshysy.

Balqashta keshe jylý magıstraldarynda eki apat boldy. Saldarynan 28 úı jylýsyz qaldy. Qazir qala bıligi men kommýnaldyq qyzmetter aqaýdy joıyp jatyr. 

Birinshi apat keshe tústen keıin Muhamedjanov kóshesindegi № 32 úıdiń janynda boldy. 426 mm dıametrli magıstraldyń burylysynda ystyq sý aǵyp ketip, keri qubyrdaǵy qysym tómendedi. Saldarynan Muhamedjanov shaǵynaýdany jylýsyz qaldy.