Elimizde biryńǵaı ulttyq elektrondy kitaphana qurylady
ASTANA. KAZINFORM — QR Mádenıet jáne aqparat mınıstrligi Arhıv, qujattama jáne kitap isi komıteti Kitap isi basqarmasynyń basshysy Almaz Myrzahmet kitaphana salasynda atqarylyp jatqan jumystar jóninde málimdedi.
Ortalyq kommýnıkatsııalar qyzmetinde ótken baspasóz konferentsııasynda ol Memleket basshysynyń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵyn eske saldy.
— Atalǵan Jarlyqtaǵy irgeli tapsyrmalardyń biri — biryńǵaı ulttyq elektrondyq platforma qurý. Qazaqstandaǵy barlyq kitaphana júıesin biriktiretin elektrondy kitaphana qurýymyz tıis. Onda biryńǵaı oqyrman bıleti, biryńǵaı katalog bolady. Sonyń arqasynda kez kelgen oblystaǵy kitaphanada qandaı kitaptardyń neshe danasy bar ekenin jáne olardy oqyrmandar neshe ret alǵanyn t. b. derekterdi onlaın júıede bilýge bolady. Sonymen birge, elektrondy kitaphanaǵa qalamgerler de óz kitaptaryn usynýyna múmkindik beriledi. Bul joba daıyndalyp, Úkimetke iske asyrý tetikteri jiberildi, — dedi Almaz Myrzahmet.
Sonymen qatar, Abaı shyǵarmashylyǵyna aıryqsha mán berilip, aqynnyń týyndylary bul jobaǵa jeke bir modýl retinde engiziletinin atap ótti.
Aıta keteıik, buǵan deıin Abaı shyǵarmashylyǵy týraly júzge jýyq ǵylymı eńbek jaryq kórgenin jazǵanbyz.
