Elimizde biryńǵaı medıtsınalyq tsıfrly platforma qalaı jumys isteıdi – komıtet tóraǵasy túsindirdi
ASTANA. KAZINFORM – Qazaqstanda medıtsınalyq uıymdardyń qyzmetin baqylaýǵa arnalǵan biryńǵaı Health Intelligence Platform tsıfrlyq platformasy iske qosyldy.
Jańa júıe arqyly medıtsınalyq mekemelerdiń lıtsenzııasy, kadrlyq áleýeti, medıtsınalyq tehnıkasy jáne basqa da mańyzdy kórsetkishteri bir aqparattyq keńistikte baqylanady. Bul týraly QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń tóraǵasy Baýyrjan Júsipov Jibek Joly telearnasyndaǵy «Búgin.LIVE» baǵdarlamasynda aıtty.
Komıtet tóraǵasynyń aıtýynsha, buǵan deıin medıtsınalyq uıymdar týraly aqparat ártúrli aqparattyq júıede saqtalyp kelgen. Al jańa platforma barlyq málimetti bir júıege biriktirip, baqylaý protsesin jeńildetken.
– Medıtsınalyq uıym týraly málimettiń barlyǵy bir júıege ıntegratsııalandy. Endi medıtsınalyq uıymnyń lıtsenzııasy, quqyqtyq qujattary, tirkelgen halyq sany, kadrlyq quramy jáne medıtsınalyq tehnıkasy týraly barlyq aqparatty bir jerden kórýge bolady,– dedi Baýyrjan Júsipov.
Onyń aıtýynsha, júıe tek medıtsınalyq uıymnyń tólqujatymen shektelmeıdi. Platformada dárigerlerdiń sertıfıkattary, jumys kestesi, shtattyq qurylymy jáne maman tapshylyǵy týraly málimetter de jınaqtalǵan. Sondaı-aq medıtsınalyq tehnıkanyń sany, paıdalaný tıimdiligi men tozý deńgeıi de baqylaýda bolady.
Komıtet tóraǵasy jańa platformanyń negizgi ereksheliginiń biri baqylaý jumystarynyń tsıfrlandyrylýy ekenin atap ótti. Endi kóptegen zańbuzýshylyqty mekemege barmaı-aq anyqtaýǵa múmkindik bar. Buǵan qosa, aldaǵy ýaqytta bul júıeniń múmkindigi jasandy ıntellekt arqyly keńeıtiledi.
Sonymen qatar ol jasandy ıntellekt densaýlyq saqtaý salasynda qazirdiń ózinde birneshe baǵytta qoldanylyp jatqanyn aıtty. Onyń biri dárigerdiń tsıfrlyq kómekshisi retinde jumys isteıdi.
– Naýqastyń shaǵymdary men zerthanalyq taldaý nátıjeleri engizilgennen keıin júıe yqtımal dıagnozdardy usynyp, dárigerge sheshim qabyldaýǵa kómektesedi. Budan bólek, jasandy ıntellekt KT jáne MRT nátıjelerin taldap, patologııalardy avtomatty túrde anyqtaý úshin de paıdalanylyp jatyr. Sondaı-aq aýrýlardy erte anyqtaýǵa arnalǵan arnaıy platformalar kezeń-kezeńimen medıtsınalyq uıymdarǵa engizilip keledi, – dedi Baýyrjan Júsipov.
Sonymen qatar komıtet tóraǵasy lıtsenzııasyz qyzmet kórsetetin medıtsınalyq uıymdarǵa qatysty júrgizilgen jumystar týraly da aıtty.
Onyń málimetinshe, baqylaý barysynda lıtsenzııasyz jumys istegen 38 medıtsınalyq uıym anyqtalǵan. Onyń 27-siniń qyzmeti ýaqytsha toqtatylǵan, al qalǵan uıymdar anyqtalǵan zańbuzýshylyqtardy qysqa merzimde joıǵan.
Sondaı-aq aqparattyq júıe arqyly medıtsına mamandary sertıfıkattarynyń jaramdylyq merzimi de baqylanyp otyr.
– Bastapqyda jaramdylyq merzimi ótken sertıfıkaty bar 3 myńnan astam medıtsına qyzmetkeri anyqtaldy. Qazirgi ýaqytta olardyń sany shamamen 2600-ge deıin azaıdy. Al 50 shaqty maman sertıfıkatyn jańartqanǵa deıin ýaqytsha jumystan shettetildi. Qujattaryn rásimdegennen keıin qaıtadan qyzmetine kirisýge múmkindik beriledi, – dedi Baýyrjan Júsipov.
Onyń aıtýynsha, qazirgi ýaqytta biryńǵaı platformaǵa mindetti áleýmettik medıtsınalyq saqtandyrý júıesi aıasynda jumys isteıtin 1800-den astam memlekettik jáne jekemenshik medıtsınalyq uıym qosylǵan. Al aldaǵy ýaqytta mindetti áleýmettik medıtsınalyq saqtandyrý júıesinde jumys istemeıtin jekemenshik medıtsınalyq uıymdardy da kezeń-kezeńimen ıntegratsııalaý josparlanyp otyr.
Aıta keteıik, endi elektrondyq jeke medıtsınalyq kitapsha barlyq adamǵa qoljetimdi bolatynyn jazǵan edik.
