Elimizde biryńǵaı áleýmettik standart ázirlenedi
ASTANA. KAZINFORM — Eńbek jáne halyqty áleýmettik qorǵaý mınıstrligine biryńǵaı áleýmettik standart ázirleý tapsyrmasy berildi. Bul týraly mınıstr Svetlana Jaqypova málim etti.
— Qaı sanattaǵy azamattardyń jeńildikten aıyrylatyny týraly aıtýǵa áli erte. Sheshim memlekettik organdar arasyndaǵy keńesýden keıin jáne qarjylyq-ekonomıkalyq múmkindikti eskere otyryp qabyldanady, — dedi Svetlana Jaqypova Májilistiń jalpy otyrysynan keıin ótken baspasóz máslıhatynda.
Mınıstrdiń málimdeýinshe, búginde óńirlerde kórsetiletin 117 áleýmettik qoldaý sharasynyń tizimi jınaldy. Alaıda olardyń mazmuny ártúrli jáne jergilikti bıýdjettiń múmkindigine baılanysty.
— Shynymen áleýmettik kómekke muqtaj azamattarǵa qoldaý sharalaryn qamtý úshin biryńǵaı áleýmettik standart ázirleý tapsyryldy, — deıdi vedomstvo basshysy.
Búgin Májilis eń tómengi jalaqyny belgileý týraly zańdy qabyldady.
Odan bólek Májilistiń jalpy otyrysynda Koreıada zańsyz júrgen qazaqstandyqtardyń máselesi qaraldy.
Aıta ketsek, qazir Qazaqstan toǵyz elmen eńbek kelisimin maquldap jatyr.