Elimizde bir kúnde úsh orman órti tirkeldi
ASTANA. KAZINFORM – 2026 jylǵy 2 shildede elimizdiń memlekettik orman qory aýmaǵynda úsh orman órti tirkeldi, dep habarlaıdy Orman sharýashylyǵy jáne janýarlar dúnıesi komıteti.
Vedomstvo málimetinshe, onyń bireýi Aqtóbe oblysynda, ekeýi Shyǵys Qazaqstan oblysynda bolǵan.
Aqtóbe oblysyndaǵy orman órti tolyq sóndirildi.
Al Shyǵys Qazaqstan oblysyndaǵy eki orman órtin oqshaýlaý jumystary jalǵasyp jatyr. Órt oshaqtary der kezinde anyqtalyp, olardy sóndirý jumystary jedel bastalǵan.
- Oqıǵa ornynda orman sharýashylyǵy qyzmetkerleri, jergilikti atqarýshy organdardyń kúshteri jáne «Qazavıaormanqorǵaý» mekemesiniń mamandary jumys júrgizip jatyr, - delingen aqparatta.
Orman sharýashylyǵy jáne janýarlar dúnıesi komıteti órt qaýipti maýsymda tabıǵat aıasynda demalý kezinde qaýipsizdik talaptaryn qatań saqtaýǵa shaqyrdy.
Aıta keteıik, keshe «Semeı ormanynda» naızaǵaıdan eki órt shyqty.
