Elimizde bir kúnde eki orman órti tirkeldi
ASTANA. KAZINFORM — 27 qyrkúıek kúni elimizdiń memlekettik orman qory aýmaǵynda eki orman órti tirkeldi, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Óńirler boıynsha Qaraǵandy oblysynda jáne Saıram-Ógem memlekettik ulttyq tabıǵı parkinde órt tutandy.
Órt oshaǵy memlekettik orman kúzetiniń jerústi baqylaýy barysynda anyqtaldy. Órtti sóndirýge memlekettik orman kúzetiniń qyzmetkerleri, TJM qyzmetkerleri men arnaıy tehnıkalar jumyldyryldy. Qazirgi sátte órt oshaqtary tolyǵymen sóndirildi.
— Dala órtteri ormanǵa jetken. Azamattardy órt qaýipti kezeńde tabıǵat aıasynda órt qaýipsizdigi erejelerin saqtaýǵa, otty paıdalaný kezinde saqtyq tanytýǵa shaqyramyz, — delingen habarlamada.
Buǵan deıin kún sýyp, kúz bastalǵanyna qaramastan, Túrkııada, ásirese Egeı jáne Jerorta teńizi óńirlerinde orman órti qaýpi áli de saqtalyp otyrǵany habarlanǵan bolatyn.
