Elimizde bir apta ishinde áleýmettik mańyzy bar birqatar azyq-túlik arzandady
ASTANA. KAZINFORM – Bıyl 5 tamyzdaǵy jaǵdaı boıynsha, esepti aptada Qazaqstanda áleýmettik mańyzy bar azyq-túlik taýarlarynyń birqatary boıynsha baǵanyń tómendeýi baıqaldy.
Ulttyq statıstıka bıýrosy málimetinshe, apta ishinde qııar (-2,4%), aq qyryqqabat (-2,1%), qyzanaq, kartop (-1,7%), súıeksiz sıyr eti (-0,4%), alma (-0,3%), qaraqumyq jarmasy (-0,2%), qaımaq (-0,1%) baǵalary tómendedi.
Birinshi surypty bıdaı unynan pisirilgen nan, súıekti sıyr eti, taýyq eti, qus eti, et farshy, súzbe, aıran jáne shaı baǵalary aptada ózgerissiz qaldy.
Óńirler bólinisinde eldiń birqatar qalasynda deflıatsııalyq dınamıka baıqaldy. Áleýmettik mańyzy bar azyq-túlik taýarlarynyń jalpy baǵa deńgeıi bir apta ishinde Shymkentte (-0,4%), Pavlodar men Taldyqorǵanda (árqaısysynda -0,2%), Aqtóbe, Kókshetaý, Qonaev, Qostanaı qalalarynda (árqaısysynda -0,1%) tómendedi. Almaty, Aqtaý, Atyraý, Jezqazǵan, Óskemen, Qaraǵandy, Petropavl jáne Taraz qalalarynda baǵalar aldyńǵy apta deńgeıinde saqtaldy.
Respýblıka boıynsha qııardyń ortasha baǵasy kılogramyna 483 teńge boldy. Eń tómen baǵa Shymkent qalasynda tirkeldi - kelisi 321 teńge.
Respýblıka boıynsha pııazdyń ortasha baǵasyna kelsek, kelisi 200 teńge deńgeıinde qalyptasty. Eń qoljetimdi baǵalar Túrkistan qalasynda - 138 teńge, Qyzylorda qalasynda 164 teńge deńgeıinde belgilendi.
Aq qyryqqabattyń respýblıka boıynsha ortasha baǵasy kelisine 191 teńge boldy. Eń tómen baǵa Túrkistan qalasynda tirkeldi - kelisi 143 teńge.
Qyzanaqtyń respýblıka boıynsha ortasha baǵasy 529 teńge boldy. Eń qoljetimdi baǵalar Taraz qalasynda (310 teńge), Shymkent jáne Túrkistanda (324 teńge) baıqaldy.
Et ónimderiniń ishinde respýblıka boıynsha súıekti sıyr etiniń ortasha baǵasy kılogramyna 3 778 teńgeni, al qoı etiniń, onyń ishinde súıeksiz etti qosa alǵanda, ortasha baǵasy kılogramyna 4 493 teńgeni qurady.
Áleýmettik mańyzy bar azyq-túlik taýarlary baǵalary ındeksiniń kórsetkishi apta saıyn esepteledi. Baǵalardy baqylaý barlyq oblys ortalyqtarynda, respýblıkalyq mańyzy bar qalalarda jáne astanada júrgiziledi. Áleýmettik mańyzy bar azyq-túlik taýarlary baǵasynyń dınamıkadaǵy ózgeristerin Qazaqstan Strategııalyq josparlaý jáne reformalar agenttigi Ulttyq statıstıka bıýrosynyń saıtynan jáne «Taldaý» aqparattyq-taldaý júıesinen kórýge bolady.
Áleýmettik mańyzy bar azyq-túlik taýarlarynyń tizbesi Qazaqstan Saýda jáne ıntegratsııa mınıstriniń 2025 jylǵy 23 jeltoqsandaǵy №362-NQ buıryǵymen bekitilgen jáne 31 ataýdaǵy azyq-túlik ónimderin qamtıdy.
Azyq-túlik ónerkásibinde turaqty oń serpin bar. Bul týraly QR Aýyl sharýashylyǵy vıtse-mınıstri Azat Sultanov málim etti.
