Elimizde bosqyn mártebesin alý tártibine ózgerister engizildi
ASTANA. KAZINFORM – Eńbek jáne halyqty áleýmettik qorǵaý mınıstriniń buıryǵymen bosqyn mártebesi bar adamdardy tirkeý, olardyń ótinishterin qaraý jáne tıisti qujattardy rásimdeý tártibine ózgerister engizildi.
Bul qujat Qazaqstan Respýblıkasy Eńbek jáne halyqty áleýmettik qorǵaý mınıstriniń 2026 jylǵy 30 maýsymdaǵy buıryǵymen bekitilgen.
Jańartylǵan erejege sáıkes, násiline, ultyna, dinine, azamattyǵyna, belgili bir áleýmettik topqa qatystylyǵyna nemese saıası kózqarasyna baılanysty qýdalaýǵa ushyraý qaýpi bar sheteldik nemese azamattyǵy joq adam bosqyn dep tanylady.
Mundaı adam óz memleketiniń qorǵaýyn paıdalana almaıtyn nemese paıdalanýdan bas tartatyn jaǵdaıda bosqyn mártebesin alýǵa úmitker bola alady.
– Atalǵan mártebeni alý úshin ótinish berýshi halyqty jumyspen qamtý máseleleri jónindegi jergilikti atqarýshy organǵa jazbasha ótinish joldaýǵa tıis. Ótinish Qazaqstan aýmaǵyna kelgen kúnnen bastap nemese qýdalaý qaýpi týyndaǵanyn bilgen sátten bastap 5 kúntizbelik kún ishinde berilýi qajet, – delingen qujatta.
Ótinishke jeke basyn kýálandyratyn qujattar qosa tirkeledi.
Sondaı-aq qujat 18 jasqa tolǵan sheteldikter men azamattyǵy joq adamdarǵa úsh aı merzimge beriledi jáne bosqyn mártebesin berý týraly ótinish qaralyp jatqan kezeńde olardyń Qazaqstan aýmaǵynda zańdy negizde bolýyn rastaıdy.
Eger ótinish otbasy múshelerimen qaýyshý maqsatynda berilse, týystyq baılanysty rastaıtyn qujattardy usyný qajet. Sonymen qatar eki tarappen, ıaǵnı pana izdep kelgen adam men qaýyshý úshin kelgen otbasy múshesimen áńgimelesý jeke-jeke júrgiziledi.
Qujat 2026 jylǵy 18 shildeden bastap qoldanysqa engiziledi.
Eske sala keteıik, buǵan deıin, Qazaqstannyń Іshki ister mınıstrligi bosqyn mártebesi bar adamdarǵa jol júrý qujattaryn berý qaǵıdalaryn jańartýdy usynǵan bolatyn.
