Qazaqstannyń bilim men tárbıe berý júıesi zaıyrly sıpatqa ıe – Konstıtýtsııalyq reforma
ASTANA. KAZINFORM – Konstıtýtsııalyq reforma jónindegi komıssııa múshesi Jaqsybek Qulekeev búgingi otyrysta jańartylatyn Konstıtýtsııa mátinin áli de jetildirýdi usynyp, naqty termınderge toqtaldy.
- Ata zańymyzda ǵylymǵa qatysty normanyń naqty bekitilgeni durys bolatynyn usynǵan bolatynmyn. Bul usynys Konstıtýtsııalyq keńes músheleriniń tarapynan tolyq qoldaýǵa ıe boldy. Osyǵan oraı, Konstıtýtsııa mátini jobasynyń preambýlasy men 1-baptyń 3-tarmaǵynda arnaıy normalar paıda boldy. Preambýlada «mádenıet jáne bilim qundylyqtaryn, ǵylym men ınnovatsııa jetistikterin baǵdarǵa ala otyryp» degen túsinik jazyldy. Bul – qýanarlyq jaǵdaı, - degen komıssııa múshesi jańartylatyn Konstıtýtsııa jobasyndaǵy 1-baptyń 3-tarmaǵy qazaq tilinde de, orys tilinde de naqtylaýdy qajet etetinin aıtty.
- Osy normany qazaq tilinde bylaı jazǵan oryndy: «Qazaqstan Respýblıkasy adam kapıtalyn, bilim-ǵylymdy jáne ınnovatsııany damytýdy memleket qyzmetiniń strategııalyq baǵyty retinde tanıdy». Bul jerde men Dıqan Qamzabekuly aıtqan oryndy usynysty atap ótip, «bilim» degen sózdiń bilim berýdi de, bilim alýdy da qamtıtyn tereń uǵymyn eskere otyryp, «bilim berý» degen sózdi tek «bilim» degen sózben almastyrǵan jetkilikti bolatynyn esterińizge salǵym keledi, - dedi ol.
Sondaı-aq, Konstıtýtsııalyq komıssııa múshesi Ata zańnyń 30-baby qalaı ózgeretinin túsindirdi.
- Bul bap qazirgi jobada 5 tarmaqtan turady. Onyń alǵashqy 4 tarmaǵy esh ózgerissiz aınalymdaǵy Konstıtýtsııa normalarynan alynyp otyr. Al 5-tarmaq – jańa norma. 5- tarmaqtyń qazaqsha mátini bylaı: Rýhanı (dinı) bilim berý uıymdaryn qospaǵanda, Qazaqstan Respýblıkasyndaǵy uıymdar men mekemelerde bilim jáne tárbıe berý júıesi zaıyrly sıpatqa ıe. Osy normany qoldasańyzdar, qoǵamda álsin-álsin kezdesip qalatyn keıbir qaıshylyqtar zańdy negizde óz sheshimin tabatyny anyq, - dedi Jaqsybek Qulekeev.
Eske salaıyq, Konstıtýtsııalyq komıssııanyń V otyrysyn Kazinform agenttiginiń resýrstarynan kórýge bolady.
Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.