Elimizde bıtým tapshylyǵy qalaı sheshilmek

ASTANA. KAZINFORM – Jol qurylysyna qajet bıtýmdy qysta satyp alý kerek. Bul týraly Senatta joldardyń máselesin talqylaýǵa arnalǵan Úkimet saǵatynda senator Álibek Náýtıev málim etti.

- Jol-qurylys materıaldarynyń jetispeýshiligi men avtomobıl joldarynyń sapasyna áser etetini belgili. Eń aldymen, bıtýmmen qamtamasyz etý máselesi bar. Bıtým naryǵy suranystyń maýsymdyq ózgerýimen sıpattalady, ıaǵnı qysta tutyný azaıady, jazda suranys kúrt artyp, aıyna 150 myń tonnaǵa jetedi. Al jumys istep turǵan bıtým zaýyttarynyń jıyntyq qýaty aıyna shamamen 100 myń tonnadan aspaıdy. Sonyń saldarynan jaz aılarynda kólem tapshylyǵy baıqalady. Suranystyń ósýimen qatar, bıtým baǵasynyń ósýi baıqalady. Bul máseleni óńirler únemi kóterip otyrady, - dedi Á.Náýtıev.

Onyń aıtýynsha, suranys tómen jáne ónimniń baǵasy aıtarlyqtaı tómen bolǵan kezde, ıaǵnı qysta bıtým satyp alý kerek. Suranystyń maýsymdyq aýytqýyna jol bermes úshin bıtým qoımalaryn salý qajettiligi de bar.

- Kólik mınıstrligi Energetıka mınıstrligimen birlesip, osy máseleniń ońtaıly sheshimin aıqyndaýy qajet dep sanaımyz. Jol-qurylys materıaldarynyń sapasyna qatysty mynalardy atap ótkim keledi. Asfaltbeton zaýyttaryna ınspektsııa júrgizgen Jol aktıvteriniń ulttyq sapa ortalyǵynyń málimetinshe, tekserilgen 211 zaýyttyń tek 82-si ǵana sapaly ónim shyǵarýǵa shamalary jetedi. Osyǵan oraı, normatıvterge sáıkes kelmeıtin jol-qurylys ónimderine jol bermeý jóninde sharalar qabyldaý qajet, - dedi depýtat.

Budan buryn habarlanǵandaı, senator jergilikti joldardyń sapasyna qatysty problemany atady.

Eske salsaq, bıyl mamyr aıynyń basynda Úkimet otyrysynda Qazaqstan nege áli bıtým ımportynan qutyla almaı otyrǵany sóz boldy.