Elimizde bırjalyq saýdaǵa jańa talaptar engizildi
ASTANA. KAZINFORM — Qazaqstanda taýar bırjalarynyń jumysyna qoıylatyn talaptar kúsheıtilip, bırjalyq saýdanyń ashyqtyǵyn arttyrýǵa baǵyttalǵan jańa retteý júıesi engizilip jatyr.
Saýda jáne ıntegratsııa mınıstrliginiń habarlaýynsha, búginde elde úsh taýar bırjasy jumys isteıdi. Áleýmettik mańyzy bar taýarlar «Eýrazııalyq saýda júıesi» jáne «Kaspıı» taýar bırjalary arqyly satylady.
2024 jylǵy 30 jeltoqsanda bırjalyq saýda men kásipkerlikke qatysty zańnamaǵa ózgerister engizildi. Onyń negizgi maqsaty — baǵany qoldan kóterý men naryq qatysýshylarynyń sóz baılasý táýekelderin azaıtyp, bırjalyq saýdaǵa barlyq qatysýshyǵa teń múmkindik berý.
Jańa talaptarǵa sáıkes, bırjalyq brokerler men klırıngtik ortalyqtar lıtsenzııa alýǵa mindetteldi. Talaptar buzylǵan jaǵdaıda lıtsenzııany ýaqytsha toqtatý nemese odan aıyrý qarastyrylǵan.
— 2026 jyldyń 1 qańtarynan bastap klırıngtik qyzmetti retteıtin tolyq júıe de iske qosyldy. Onyń aıasynda mindetti lıtsenzııalaý jáne memlekettik baqylaý engizildi. Sonymen qatar bırjalyq saýdaǵa adal emes qatysýshylardyń tizilimin qalyptastyrý kózdelip, mámileler týraly aqparatty saqtaý talaptary kúsheıtildi, — delingen habarlamada.
Áleýmettik mańyzy bar taýarlar endi Úkimet konkýrs arqyly aıqyndaǵan taýar bırjalarynda satylady. Bul saýdany talaptarǵa saı bırjalyq alańdarǵa shoǵyrlandyryp, naryqtaǵy básekelestikti arttyrýǵa múmkindik beredi.
Qazaqstandaǵy bırjalyq ınfraqurylym «Astana» halyqaralyq qarjy ortalyǵy (AHQO) aıasynda da damyp keledi. Munda taýar aktıvteri men týyndy qarjy quraldarymen uıymdastyrylǵan saýdaǵa arnalǵan jeke retteý júıesi qalyptasqan.
AHQO Qarjylyq qyzmetterdi retteý komıteti ETSE Ltd. kompanııasyna kópjaqty saýda alańy (MTF) retinde qyzmet kórsetýge lıtsenzııa bergen.
Jańa retteý tetikteri bırjalyq saýda quraldaryn keńeıtip, taýar naryqtarynyń ashyqtyǵyn arttyrýǵa jáne halyqaralyq saýdany damytýǵa baǵyttalǵan.
Eske salaıyq, buǵan deıin Qazaqstanda bırjalyq brokerlerge mindetti lıtsenzııalaý engiziletinin habarlaǵanbyz.
