Elimizde byltyr 7 óńir aǵash otyrǵyzýdan jospardy oryndamaǵan

PETROPAVL. KAZINFORM – Soltústik Qazaqstan oblysy Memleket basshysynyń tapsyrmasyna oraı bıyl 6,3 myń ga aýmaqqa 39 mln-ǵa jýyq kóshet otyrǵyzýdy josparlaǵan. 

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, óńirdiń orman qory 549,5 myń ga aýmaqty alyp jatyr, onyń 415,5 myń ga – ormandy alqap. Prezıdenttiń 2020 jylǵy 1 qyrkúıektegi tapsyrmasyna saı oblys 20 myń ga aýmaqqa 100 mln kóshet otyrǵyzýy kerek. 

«2021-2025 jyldarǵa arnalǵan ormandardy molyqtyrý jáne orman ósirý kólemin ulǵaıtýdyń keshendi jospary ázirlendi. 2021-2023 jyldary 28,2 mln dana kóshet otyrǵyzyldy, bul jalpy jospardyń 28%. Byltyr 17,7 mln. dana kóshet otyrǵyzyldy nemese jospardyń 77% ǵana oryndaldy. 

Jalpy 2023 jyly respýblıka boıynsha SQO-dan bólek 6 oblys jospardy oryndamady, olardyń ishinde Pavlodar - 5%, Qaraǵandy – 12%, Qostanaı – 45%, Aqtóbe - 66%, Qyzylorda -75%, Aqmola-83% ǵana kóshet ekken. 

Bizdiń aımaq boıynsha jospardyń oryndalmaýynyń sebebi - otyrǵyzý materıalynyń jetispeýshiligi», - deıdi basqarmanyń basshysy Beıbit Ismanov. 

2021 jyldan 2023 jylǵa deıingi kezeńde jergilikti bıýdjetten aǵash otyrǵyzý jumystaryn júrgizý úshin mamandandyrylǵan tehnıka men jabdyqtar satyp alýǵa 463 mln teńge jumsalǵan. 
«Bıyl pıtomnıkterdi keńeıtýge jáne jumysyn qamtamasyz etýge, arnaıy tehnıka, tuqym satyp alýǵa jergilikti bıýdjetten 2 mlrd 240 mln teńge bólinbek. Qazirdiń ózinde 152 mln teńgege 12 aǵash otyrǵyzý mashınasy jáne 2 órt sóndirý kóligi satyp alyndy.

Keshendi josparǵa sáıkes bıyl 6 350 gektarǵa 38,7 mln dana kóshet otyrǵyzylýy kerek. Bul 2021 jylmen salystyrǵanda 7 esege kóp. 2025 jyly 7 myń gektar alqapqa 45 mln dana kóshet otyrǵyzý josparlanǵan. 

Qazirgi ýaqytta oblystyń orman ıeleri ýaqytsha orman pıtomnıkterinde otyrǵyzý materıalyn qazyp daıyndap jatyr», - deıdi basqarma basshysy. 

Kún jylynǵaly ormanshylar 394 gektar jerge 2,3 mln dana kóshet otyrǵyzǵan. 

Kóshetpen qamtamasyz etý máselesin sheshý úshin byltyr Aqqaıyń orman sharýashylyǵynda aýdany 30 gektar orman pıtomnıgin uıymdastyrý boıynsha jobalyq-smetalyq qujat ázirleýge 20 mln teńge bólindi. 

«Bul pıtomnıkti uıymdastyrýǵa shamamen 400 mln teńge qajet. Nátıjesinde ol jyl saıyn 10 mln kóshet beretin bolady.

Sondaı-aq jumys istep turǵan pıtomnıkterdi keńeıtý josparlanǵan. Qajetti kerek-jaraqty satyp alýǵa uńǵyma qazýǵa qajetti qarajat bólindi. Bul jyl saıyn 20 mln jýyq kóshet alýǵa múmkindik beredi», - deıdi Beıbit Ismanov. 

Buǵan deıin SQO-da tasqyn sýdyń kóp qoqys ákelýine baılanysty órt shyǵý qaýpiniń artqanyn aıtqan edik.