Elimizde bıyl bastaýysh synyptarda baǵalaýdyń jańa tásilderi engiziledi
ASTANA. KAZINFORM – 2026 jylǵy 1 qyrkúıekten bastap 2-4-synyp oqýshylarynyń bilimin baǵalaýdyń jańartylǵan tásilderi engiziledi. Bul rette krıterıaldy baǵalaý júıesi saqtalady, al 1-synyptarda baǵalaý tártibi ózgerissiz qalady.
Bul týraly QR Oqý-aǵartý birinshi vıtse-mınıstri Shynar Aqparova Ortalyq kommýnıkatsııalar qyzmetiniń alańynda málimdedi.
Onyń aıtýynsha, buǵan deıin oqýshylardyń oqý jetistikteri formatıvtik jáne jıyntyq baǵalaý arqyly anyqtalǵan. Jıyntyq baǵalaý bólim boıynsha jáne toqsan boıynsha baǵalaýdy qamtyǵan. Jańa tásilde formatıvtik baǵalaý saqtalyp, onyń toqsandyq qorytyndy baǵadaǵy úlesi artady. Buǵan deıin onyń úlesi 25% bolsa, endi 50%-ǵa deıin kóbeıedi.
– Buǵan deıin toqsandyq baǵany shyǵarý kezinde oqýshynyń kúndelikti sabaqta alǵan formatıvtik baǵalary jalpy nátıjeniń 25 paıyzyn quraıtyn. Endi bul kórsetkish 50 paıyzǵa deıin artady. ıAǵnı toqsandyq baǵanyń jartysy oqýshynyń toqsan boıyndaǵy kúndelikti sabaqtaǵy oqý nátıjesi negizinde qalyptasady, – dedi Shynar Aqparova.
Vıtse-mınıstrdiń aıtýynsha, bul ózgeris oqýshynyń sabaqtaǵy turaqty eńbegin, tapsyrmalardy oryndaýyn jáne oqý maqsattaryn meńgerý deńgeıin qorytyndy baǵalaýda kóbirek eskerýge múmkindik beredi. Sonymen qatar oqý bólimderin meńgerý nátıjesin anyqtaý úshin aralyq baǵalaý engiziledi. Jańa tártipke sáıkes, pedagog toqsan ishinde ár pán boıynsha ár oqýshyny ótkizilgen sabaqtardyń keminde 30%-ynda baǵalaýy tıis.
– Mysaly, toqsanda pán boıynsha 30 sabaq ótkizilse, ár oqýshy keminde 9 sabaqta formatıvtik ball alýy tıis. Bul – baǵalaýdyń eń tómengi jıiligi. Pedagog oqýshyny odan da jıi baǵalaı alady, – dedi ol.
Birinshi vıtse-mınıstr bul talap oqýshynyń bilimindegi ilgerileýdi júıeli baqylaýǵa jáne onyń kúndelikti eńbegin baǵalaýǵa múmkindik beretinin atap ótti.
Aıta keteıik, jańa oqý jylynda 380 myńnan astam bala birinshi synypqa barady.
