Elimizde bıdaı men júgerini óńdeýge arnalǵan 5 iri joba iske qosylady

ASTANA. KAZINFORM — 2028 jylǵa deıin bıdaı men júgerini óńdeýge arnalǵan 5 iri joba iske qosylady. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty. 

— Astyqty tereń óńdeýge erekshe nazar aýdarylyp otyr. Búginde jylyna 510 myń tonna qýattylyǵy bar 3 kásiporyn jumys istep jatyr. Ónim assortımenti: krahmal, glıýten, patoka, bıoetanol. 2028 jylǵa deıin bıdaı men júgerini óńdeýge arnalǵan qýattylyǵy jylyna 4,8 mln tonna bolatyn 5 iri jobany iske qosý josparlanyp otyr. Salaǵa salynatyn ınvestıtsııalar kólemi — 2,6 mlrd AQSh dollary, 3,3 myń jańa jumys oryndary ashylady. Ónim assortımenteri amınqyshqyldar, shárbattarmen jáne dárýmendermen keńeıtiledi, — dedi mınıstr.

Onyń aıtýynsha, ınnovatsııalyq óndiristerdi shıkizatpen qamtamasyz etý máselesi júgeriniń egis alqaptaryn keńeıtýdi kózdeıtin ártaraptandyrý sharalary aıasynda júzege asyrylady.

— Qaıta óńdelgen ónim úlesin arttyrý maqsatynda ınvestıtsııalyq jobalardy iske asyrý boıynsha júıeli jumys istelip jatyr. Bıyl jalpy somasy 108,5 mlrd teńge bolatyn 40 joba pysyqtaldy, onyń ishinde 29 joba iske qosyldy. Bul jobalar maıly daqyldardy, et, jemis, jún óńdeý, qurama jem óndirisin jáne ózge de baǵyttardy qamtıdy, — dedi ol. 

Aıta ketelik bıyl 9 aıda 2,5 mlrd dollardyń aýyl sharýashylyǵy ónimderi eksportqa shyǵaryldy.