Elimizde beton jaımasyna qoıylatyn biryńǵaı talap engizildi
ASTANA. KAZINFORM — Bıyl 1 qarashadan bastap Qazaqstanda beton jaımasyna arnalǵan jańa ulttyq standart qoldanysqa engiziledi. Qujat kanaldardy, eńisterdi jáne sý sharýashylyǵy qurylystaryn nyǵaıtý úshin qoldanylatyn materıaldyń sapasyna qoıylatyn biryńǵaı talaptardy belgileıdi. Bul týraly Saýda jáne ıntegratsııa mınıstrligi habarlady.
QR ST 4051-2026 «Betondy jaımalar. Tehnıkalyq sharttar» ulttyq standartyna Qazaqstan Respýblıkasy Saýda jáne ıntegratsııa mınıstrligi Tehnıkalyq retteý jáne metrologııa komıteti tóraǵasynyń buıryǵymen bekitildi.
Qujatty otandyq óndirýshilerdi qoldaý jáne beton jaımasyn óndirýge, synaýǵa ári qoldanýǵa qoıylatyn biryńǵaı talaptardy belgileý maqsatynda «Kazakh Industrial Stroi» JShS ótinimi boıynsha «Qazaqstan standarttaý jáne metrologııa ınstıtýty» respýblıkalyq memlekettik kásiporny ázirledi.
Beton jaımasy — qurǵaq tsement qospasy negizinde jasalǵan geosıntetıkalyq kompozıtsııalyq materıal. Ylǵaldanǵannan keıin ol beriktik pen qattylyqqa ıe bolady.
Bul materıal gıdrotehnıkalyq jáne basqa da sý sharýashylyǵy qurylystaryn salý, jóndeý jáne qalpyna keltirý kezinde qoldanylady. Ol jabyndardy, eńister men úıindilerdi nyǵaıtýǵa, sý burý kanaldaryn, ırrıgatsııalyq jáne melıoratsııalyq qurylystardy, jasandy sý aıdyndary men beton naýalardy jasaýǵa paıdalanylady. Alaıda standart jalpyǵa ortaq paıdalanylatyn avtomobıl joldary men ýaqytsha joldardy salýǵa arnalǵan materıaldarǵa qoldanylmaıdy.
Qujat beton jaımasynyń qandaı sıpattamalarǵa sáıkes bolýy kerektigin aıqyndaıdy. Olardyń qatarynda ıilý men sozylý kezindegi beriktik, tsement eritindisiniń syǵylýǵa beriktigi, statıkalyq tesilýge tózimdilik, sý ótkizbeıtin, aıazǵa tózimdilik jáne sý sińirgishtik kórsetkishteri bar.
Sondaı-aq ónimdi qabyldaý tártibi, qabyldaý-tapsyrý jáne merzimdik synaqtardy ótkizý talaptary jeke belgilengen. Árbir ónim partııasy sapa qujatymen birge jetkizilýge tıis. Onda óndirýshi men partııa týraly málimetter, oramdar sany jáne tıisti synaqtardyń nátıjeleri kórsetiledi.
Biryńǵaı talaptar óndirýshilerge ónim sapasyn baqylaýǵa, al tapsyrys berýshilerge onyń sıpattamalaryn baǵalaýǵa múmkindik beredi. Bul otandyq óndiristi damytýǵa jáne qazaqstandyq materıaldardyń básekege qabilettiligin arttyrýǵa jaǵdaı jasaıdy.
Aıta keteıik, Sý resýrstary mınıstrligi Úlken Almaty kanalyn betondaý boıynsha joba ázirlep jatyr.
