Elimizde benzın men dızel baǵasyn memleket rettemeýi múmkin

ASTANA. KAZINFORM – Energetıka mınıstrligi elimizde benzın men dızel quny álemdegi eń tómen baǵalardyń biri bolyp qala beredi dep sendirip otyr. Biraq bul jaǵdaı kórshi eldermen salystyrǵanda aıtarlyqtaı baǵa alshaqtyǵyna ákeledi. 

– Mysaly, Qazaqstanda AI-92 benzıniniń baǵasy lıtrine – 205 teńge, Reseı Federatsııasynda – 288 teńge, Qyrǵyzstanda – 385 teńge, Ózbekstanda 489 teńgeni quraıdy. Qazaqstanda dızel otyny lıtrine – 295 teńge, Reseı Federatsııasynda – 355 teńge, Qyrǵyzstanda – 427 teńge, Ózbekstanda 528 teńge turady. Osylaısha, AI-92 benzıni baǵasyndaǵy aıyrmashylyq 40%-dan 138%-ǵa deıin, al dızel quny 20%-dan 79%-ǵa deıin jetedi. Bul janar-jaǵarmaı tapshylyǵyn týdyryp, zańsyz shetelge áketý qaýpin týdyrady, - delingen habarlamada. 

Osy oraıda Energetıka mınıstrligi baǵa belgileýdiń turaqty modeli saıasatyna kóship jatyr. 

– Ol suranys pen usynys arasyndaǵy naryqtyq teńgerimdi qurýǵa, janar-jaǵarmaı tapshylyǵyn joıýǵa, munaı óńdeý salasyn jańǵyrtýdy yntalandyrýǵa, jańa jumys oryndaryn qurýǵa jáne uzaq merzimdi ınvestıtsııalardy tartýǵa baǵyttalǵan. Bul saıasattyń negizgi prıntsıpteri kez kelgen ózgeristi boljaýǵa bolatyndyǵyn bildiredi. Azamattardyń múddesin qorǵaý úshin áleýmettik qoldaý sharalaryn kórsetý jalǵasady, al aýyl sharýashylyǵy óndirýshileri ashyq ári qolaıly baǵa boıynsha dızel otynyna kepildi túrde qol jetkize alady, - dep túsindirdi vedomstvodan. 

Sondaı-aq Energetıka mınıstrligi múddeli organdarmen birlesip naryqty baqylaýdy kúsheıtedi, zańnamanyń oryndalýyn jáne janar-jaǵarmaıdyń ishki naryqqa úzdiksiz jetkizilýin qamtamasyz etpek. 

Byltyr Energetıka mınıstrligi barlyq aımaqta janarmaı qory úzdiksiz tolyqtyrylyp otyr degen málimdeme jasady.