Zań jobasy: baılanys operatorlary kópqabatty úılerge stansany erkin ornata alady

ASTANA. KAZINFORM — Qazaqstanda baılanys operatorlaryna kópqabatty turǵyn úılerdiń shatyrlaryna bazalyq stansany ornatýǵa turǵyndardyń kelisiminsiz ruqsat berilýi múmkin.

Atalǵan jańashyldyq Tsıfrlyq damý, ınnovatsııalar jáne aeroǵarysh ónerkásibi mınıstrligi ázirlegen zań jobasynda qarastyrylǵan. Qujat «Ashyq NQA» portalynda jarııalanyp, 4 maýsymǵa deıin qoǵam talqylaýyna usynyldy. 

Jobaǵa sáıkes, eger baılanys operatorynda sanıtarııalyq-epıdemıologııalyq qorytyndy bolsa, kópqabatty turǵyn úı jáne ǵımarattardyń menshik ıeleri telekommýnıkatsııalyq jabdyqty ornatýdan bas tarta almaıdy.

— Kondomınıým nysandarynyń, ǵımarattardyń, qurylystardyń, páterler men turǵyn emes úı-jaılardyń menshik ıelerine nemese olardyń ýákiletti ókilderine sanıtarııalyq-epıdemıologııalyq qorytyndy bolǵan jaǵdaıda telekommýnıkatsııalyq jabdyqty ornatýdan bas tartýǵa tyıym salynady, — delingen qujatta.

Sonymen qatar turǵyndar baılanys sapasyn qamtamasyz etý úshin shatyr men ózge de alańdarǵa baılanys operatorlaryna teń dárejede ruqsat berýge mindetti.

Zań boıynsha operator aldymen múlik ıeleriniń birlestigi ókiline, kooperatıv nemese tutynýshylar kooperatıviniń tóraǵasyna júginedi. Ol 15 jumys kúni ishinde jabdyqty ornalastyrý shart jasaýy tıis.

Buǵan deıin elimizde bazalyq stansa ornatýdyń daýǵa aınalyp otyrǵany týraly jazǵan edik. Atap aıtqanda, zańgerler qarsy, operatorlar qoldap otyr. 

Eske sala ketsek, bazalyq stansa ornatýǵa úı turǵyndarynyń 70% kelisimi kerek.